Сифатга тўлиқ жавоб берасиз: Мирзиёев стандартлаштириш тизимини ислоҳ қилди

ТАШКЕНТ, 2 мая — Sputnik. Ўзбекистон президенти Шавкат Мирзиёев ўз қарори билан стандартлаштириш ва сертификатлаштириш тизимини тубдан такомиллаштириш юзасидан ислоҳотларни ишга туширди, деб хабар қилди Sputnik Ўзбекистон мухбири.

Маълум бўлишича, мазкур соҳада муаммолар анчадан буён давом этмоқда. Жумладан, экспертлар ҳисобига кўра, "Ўзстандарт" агентлигининг ташкилий тузилмаси халқаро талабларга жавоб бермаган ҳамда белгиланган вазифаларнинг самарадор бажарилиши таъминланмаган эди. Айниқса, ISO халқаро ташкилоти стандартларини қабул қилиш иши яхши ташкил этилмаган эди. Миллий стандартлаштириш ҳужжатлари фондида уларнинг улуши атиги 13 фоизни ташкил этади.

Бундан ташқари, агентлик республика корхоналарига халқаро сифат бошқарувчи тизимларини жорий этиш бўйича кўмак бериш ишида оқсамоқда. Ниҳоят, республиканинг мавжуд эталон базаси саноатнинг алоҳида соҳаларида қўлланувчи юқори аниқликдаги ускуналарни метрологик назорат билан қамраш имконини бермас эди.

Ушбу янги қарор муаллифларининг фикрига кўра, қабул қилинган ислоҳотлар мазкур соҳадаги вазиятни тартибга келтиради. "Йўл харитаси" сифатида давлат етакчиси томонидан тасдиқланган 2017-2020 йилларда "Ўзстандарт" агентлиги фаолиятини янада такомиллаштириш ва иш самарадорлигини ошириш бўйича комплекс чора-тадбирлар дастури бўлади.

Шу ерда бир қанча йўналишлар: ҳусусан, сохада қонуний базани такомиллаштириш, замонавийлаштириш ва агентлик лабораториялари ҳамда минтақавий марказларини модернизация қилишни, замонавий юқори аниқликка эга ўлчаш ва текшириш аппаратураси билан қайта жиҳозлаш алоҳида эътиборга лойиқ.

Бундан ташқари, 2 мингдан ортиқ халқаро стандартларни босқичма-босқич қабул қилиш орқали уларнинг стандартлаштириш бўйича меъёрий ҳужжатлар миллий фондидаги улушини икки баробарга ошириш ҳамда 9 мингдан ортиқ корхонада халқаро стандартларга мос келадиган сифат менежменти тизимларини жорий этиш кўзда тутилган. 2020 йилга қадар бундай корхоналар сонини 4,6 баробарга ошириш режалаштирилган.

"Ўзстандарт" агентлиги лабораторияларини халқаро даражада тан олинган ташкилотларда аккредитация қилиш йўли билан уларда амалга оширилган синов натижаларининг жаҳон миқёсида тан олиниши учун шарт-шароитлар яратилади. Стандартлаштириш, метрология ва сертификатлаштириш соҳасида халқаро ҳамкорликни ривожлантириш, шунингдек, "Ўзстандарт" агентлиги ходимлар салоҳиятини ошириш ва унинг фаолиятига ахборот-коммуникация технологиялари жорий этилади.
Шу билан бирга, давлат раҳбари соҳанинг бошқарув тизимини жиддий силкитди. Бунга мисол сифатида, ушбу қарор билан

"Ўзстандарт" агентлиги қошида "Ўзбекистон мувофиқликни баҳолаш органларини аккредитация қилиш маркази" ва "Ўзбекистон миллий метрология институти" давлат корхоналари ташкил этилди ҳамда "Республика синов ва сертификатлаштириш маркази" давлат корхонасини қайта ташкил этишни назарда тутган ҳолда "Ўзстандарт" агентлигининг янгиланган ташкилий тузилмаси тасдиқланди.

Биринчи тузилма мувофиқликни баҳолаш соҳасидаги давлат сиёсатини амалга оширишда иштирок этиш, мувофиқликни баҳолаш органлари ва метрологик хизматларни халқаро стандартларга мувофиқ аккредитация қилиш, шунингдек, мувофиқликни баҳолаш органлари ва метрологик хизматлари томонидан белгиланган шартлар ва талаблар бажарилиши устидан инспекция назоратини амалга оширади.

Иккинчи тузилма эса Ўзбекистон Республикаси Миллий эталонлар базасини такомиллаштириш ва ривожлантириш бўйича чораларни амалга ошириш, эталонлар, энг юқори аниқликдаги ўлчов воситаларини сақлаб туриш, уларни халқаро даражада солиштириш, шунингдек, ўлчов бирликларини сақлаш ва узатиш, уларнинг ягона бирликда бўлишини таъминлаш бўйича норматив ҳужжатларни ишлаб чиқиш, метрологик назорат натижаларини ўзаро тан олиш бўйича халқаро шартномаларни амалга ошириш, метрологик текширувни ва метрология соҳасида илмий тадқиқотларни амалга ошириш вазифалари билан шуғулланади.

Тасдиқланган чора-тадбирлар дастурининг самарали ижросини таъминлаш мақсадида стандартлаштириш, метрология, сертификатлаштириш ва сифат менежменти тизимларини жорий этишни мувофиқлаштириш бўйича махсус ишчи гуруҳ ташкил этилди.

Қарор муаллифлари ушбу қарорнинг амалга оширилиши миллий стандартларни халқаро талаблар билан мослаштириш ҳамда замонавий сифат менежменти тизимларини кенг жорий этади. Маҳаллий маҳсулотларнинг рақобатдошлиги оширилади ва ташқи савдодаги техник тўсиқларни бартараф этиб, маҳаллий маҳсулотларни экспорт қилишда миллий лабораториялар томонидан амалга оширилган ўлчаш ва синов натижаларининг чет элларда тан олиниши учун асос яратилади.

Шунингдек, саноат тармоқларида қўлланилаётган юқори аниқликдаги асбобларни тўлиқ метрологик текширувдан ўтказиб, бир қатор эталонлар ва энг юқори аниқликда ўлчаш воситаларини харид қилиш орқали миллий корхоналарнинг хорижий мамлакатлар метрология институтига боғлиқлигини камайтириш имконини беради.

Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.