ТОШКЕНТ, 24 июл – Sputnik. Хитой раиси Си Цзиньпин Ўзбекистон президенти Шавкат Мирзиёевни туғилган куни билан табриклади. Бу ҳақда президент матбуот котиби Шерзод Асадов хабар берди.
“Ҳурматли президент жаноблари! Таваллуд кунингиз муносабати билан сизга самимий табрикларим ва энг эзгу тилакларимни изҳор этаман”, - дейилади табрикда.
Табрик матнида “Хитой - Марказий Осиё” иккинчи саммитида Хитой билан Ўзбекистон ўртасидаги стратегик шериклик муносабатларини янги даврда ривожлантиришнинг стратегик йўналишлари белгилаб олингани қайд этилган.
“Мен Хитой-Ўзбекистон муносабатларини ривожлантиришга алоҳида эътибор қаратаман ҳамда ўртамизда қарор топган самарали амалий алоқалар ва дўстликни юксак қадрлайман. Шанхай ҳамкорлик ташкилотининг Тяньцзин саммитида ҳамда Хитой халқининг япон босқинчиларига қарши урушидаги Ғалабаси ва Фашизмга қарши жаҳон урушидаги Ғалабасининг 80 йиллигига бағишланган тантанали тадбирларда иштирок этаётганингиз муносабати билан сизни Хитойда қутлашдан мамнунман”, - дейилади табрикда.
Шунингдек, Си Цзиньпин Шавкат Мирзиёевга мустаҳкам соғлик ва фаровонлик тилаган.