TOШКЕНТ, 16 окт — Sputnik. Ўзбекистонда парламент сайловлари демократия йўлидаги муҳим қадам бўлади. Бу ҳақда мамлакатнинг Россия Федерациясидаги элчиси Ботиржон Асадов МДҲ Ижроия қўмитасида бўлиб ўтган сайловлар мавзусига бағишланган брифингда маълум қилди.
Ботиржон Асадов ўз сўзида республикада бўлиб ўтадиган парламент сайловлари демократияни мустаҳкамлаш йўлидаги муҳим қадам бўлишига ишонч билдирди.
“Ушбу сайловлар Ўзбекистонда демократик жараёнларни мустаҳкамлаш йўлидаги муҳим қадам бўлиб, фуқароларимизга ўз хоҳиш-истакларини билдириш, ўз манфаатларини давлат даражасида ҳимоя қиладиган ўз вакиллари – депутатларни сайлаш имконини беришига ишонч билдирмоқчиман”, — деди элчи.
Унинг сўзларига кўра, сайлов Россияда бўлиб турган Ўзбекистон фуқаролари учун ташкил этилади. Улар республика фуқаролари яшайдиган ёки ишлаётган жойларда амалга оширилади.
“Биз фуқароларимизни шу куни келиб, ўз конституциявий ҳуқуқидан фойдаланишга чақирмоқчимиз”, — деди элчи.
Шундай қилиб, 27 октябрь куни Владивосток, Қозон, Новосибирск, Ростов, Санкт-Петербург, Екатеринбург ва Москвадаги бош консулликларда сайлов жараёнлари ташкил этилади.
Эслатиб ўтамиз, 27 октябрь куни Ўзбекистон Олий Мажлиси Қонунчилик палатаси, Халқ депутатлари вилоятлар ва Тошкент шаҳар кенгашлари, Халқ депутатлари туман ва шаҳар кенгашларига сайловлар бўлиб ўтади. Ўзбекистоннинг 39 та чет давлатдаги дипломатик ва бошқа ваколатхоналари ҳузурида 56 та сайлов участкаси тузилган. Уларнинг сони Россияда 7 та.