ТОШКЕНТ, 7 янв — Sputnik. Бугундан бошлаб мигрантлар Россияда иш бошлагани ҳақида Ички ишлар вазирлигини хабардор қилишлари керак. Бу ҳақда вазирликнинг тегишли ҳужжатида назарда тутилган.
Ўтган йили Россия Ички ишлар вазирлиги хорижликлар Россияда ишга жойлашиш ёки патент олишда тўлдиришлари керак бўлган хабарнома шаклини тасдиқлаган эди. Бугундан ҳужжат кучга киради.
"Патент олган чет эл фуқароси ёки фуқаролиги бўлмаган шахс томонидан меҳнат фаолиятини амалга оширганлиги тўғрисида хабарнома патент берилган кундан бошлаб икки ой ичида патент берган Россия Ички ишлар вазирлигининг вилоят ва туман даражасидаги ҳудудий органига тақдим этилади”, — дейилади ҳужжатда.
Хабарнома рус тилида қўлда ёки компьютерда тўлдирилиши мумкин. Шунингдек, унга меҳнат шартномасининг нусхаси ҳам илова қилиниши керак. Шундан сўнг, ҳужжатлар Ички ишлар вазирлигининг ҳудудий бошқармасига топширилиши лозим.