ТОШКЕНТ, 25 июн — Sputnik. Венесуэла президенти Николас Мадуро “Вагнер” ХҲК раҳбари Евгений Пригожин томонидан уюштирилган қуролли исён кўтаришга бўлган уринишни қоралайди ва Россия президенти Владимир Путинни тўлиқ қўллаб-қувватлайди. Бу ҳақда республика ТИВ баёнотида маълум қилинган.
“Венесуэла Боливариан Республикаси президенти Николас Мадуро Морос Венесуэла халқи ва ҳукумати номидан “Вагнер” гуруҳи ва унинг етакчиси Евгений Пригожиннинг Россия Федерациясида террористик усуллар билан қуролли исёнга кўмаклашган иррационал таҳдидини қоралайди”, - дейилган баёнотда.
“Венесуэла Россия Федерациянинг конституциявий президенти ва унинг Қуролли кучларининг олий бош қўмондони Владимир Путинни тўлиқ қўллаб-қувватлайди”, - дейилган ТИВ хабарида.
Шунингдек, Венесуэла Россия халқига бирдамлик билдирган.
Бир кун аввал Россия Федерал хавфсизлик (ФХХ) ижтимоий тармоқларда Евгений Пригожин номидан тарқалаётган ва “Вагнер” ХҲК қисмларига Мудофаа вазирлиги зарба бергани ҳақидаги хабарлар ҳақиқатга мос келмаслиги ва ахборот провокацияси эканини маълум қилди. Россия ФХХ Тергов бошқармаси Пригожинга қарши Жиноят кодексининг 297 моддаси билан (“Қуролли исён ташкил этиш”) жиноий иш очди.
Россия президенти Владимир Путин россияликларга йўллаган мурожаатида исён кўтаришга уринганларнинг ҳаммаси жазоланиши, қонун ва халқ олдида жавоб беришини маълум қилди.
Беларусь раҳбари матбуот хизмати Пригожин Александр Лукашенконинг “Вагнер” жангчилари ҳаракатланишини Россия ҳудудида тўхтатиш ҳақидаги таклифини қабул қилганини маълум қилди. Аниқлик киритилишича, “стол устида вазиятни ҳал этишнинг мутлақо фойдали ва мақбул варианти турибди".
Шундан сўнг “Вагнер” раҳбари Евгений Пригожин жангчиларини тўплаб, дала лагерларига қайтиб кетишини маълум қилди.
Россия президенти матбуот котиби Дмитрий Песков Пригожинга қарши жиноий иш тугатилиши ва у Беларусга кетишини маълум қилди. Кремль вакили олий мақсад қон тўкилишининг ва ички ихтилофнинг олдини олиш бўлганини таъкидлади.