ТОШКЕНТ, 15 май — Sputnik. Сиёсий партияларнинг муддатидан илгари Ўзбекистон президенти сайловида иштирок этишига расман ижозат берилди. Марказий сайлов комиссияси 15 май куни бўлиб ўтган навбатдаги мажлисда тегишли қарорни қабул қилди.
Мажлисда сиёсий партияларнинг муддатидан илгари Ўзбекистон президенти сайловида иштирок этишига ижозат бериш тўғрисидаги масала кўриб чиқилди.
Ўзбекистон Халқ демократик партияси, Тадбиркорлар ва ишбилармонлар ҳаракати – Ўзбекистон либерал-демократик партияси, Ўзбекистон “Адолат” социал-демократик партияси, Ўзбекистон Экологик партияси ҳамда Ўзбекистон “Миллий тикланиш” демократик партияси президент сайловида иштирок этишга ижозат беришни сўраб, ҳужжатларини тақдим этган.
“Мазкур партияларга 2023 йил 9 июль куни бўлиб ўтадиган Ўзбекистон Республикаси президенти сайловида иштирок этиши учун ижозат берилди ва тегишли қарорлар қабул қилинди”, - дейилган хабарда.
Шунингдек, мажлис доирасида, сиёсий партияларнинг ваколатли вакилларига сайловда иштирок этишга ижозат берилганлиги тўғрисидаги гувоҳнома ҳамда белгиланган намунадаги имзо варақалари бланкалари топширилди.
9 май куни бўлиб ўтадиган муддатидан илгари Ўзбекистон президенти сайловига Экопартия ўз етакчиси Абдушукур Ҳамзаев, ХДП Улуғбек Иноятов, "Адолат" СДП Робахон Маҳмудова, ЎзЛиДеП Шавкат Мирзиёевни номзод сифатида кўрсатишини маълум қилган. “Миллий тикланиш” партияси эса ўз номзодини қўймаслиги ва ЎзЛиДеП билан биргаликда Мирзиёев номзодини қўллаб-қувватлашини маълум қилди.