ТОШКЕНТ, 20 апр — Sputnik. Ўзбекистонда Рамазон ҳайити 21 апрель куни нишонланади. Бу ҳақда Ўзбекистон мусулмонлари идораси маълум қилди.
Ўзбекистон мусулмонлари идорасида Рамазон ойи ва ҳайитини аниқлаш учун тузилган Ишчи гуруҳи хориждаги нуфузли астрономия марказлари ва Ўзбекистон Республикаси Фанлар академияси қошидаги Астрономия институтидан олган маълумотларга кўра, 1444 ҳижрий йил Шаввол ойининг янги ой фазаси (ҳилоли) шу йил 20 апрель, пайшанба куни Тошкент вақти билан соат 09:12 да содир бўлган (туғилган).
"Ўзбекистон мусулмонлари идораси Уламолар Кенгаши ислом дини таълимотлари ва мазкур астрономик маълумотларга асосланган ҳолда республикада жорий йилда Рамазон ҳайити 2023 йил 21 апрель, жума кунига тўғри келиши ҳақида қарор қабул қилди" - дейилган хабарда.
Рамазон ҳайити куни пойтахтда махсус автобус йўналишлари ташкил этилади. Мазкур автобус йўналишлари соат 04:00 дан 07:00 га қадар ҳаракатланган ҳолда фуқароларнинг масжидларга келиб кетишлари учун хизмат кўрсатади.
Ҳайит куни метро поездлари доимий жадвал асосида соат 04:00 дан иш бошлайди. Шунингдек, бошқа дам олиш кунлари метро поездлари якшанба куни учун тасдиқланган жадвал асосида соат 05:00 дан ҳаракатланади.