ТОШКЕНТ, 22 сен — Sputnik. Алексей Навальный сешанба куни Берлиннинг стационар "Шарите" клиникасидан чиқарилди, деб хабар бермоқда РИА Новости.
"Бемор ҳолати шу даражада яхшиландики, тез тиббий ёрдам кўрсатишни тўхтатиш мумкин. Алексей Навальный "Шарите"да 32 кун даволанди, шундан 24 куни — жонлантириш бўлимида кечди", — дейилади тиббий муассаса баёнотида.
"Шарите"да таъкидланишича, даволовчи шифокорлар Навальныйнинг тўлиқ тузалиб кетишига ишонч билдиришмоқда. Уларнинг сўзларига кўра, ҳозирча "заҳарланишнинг кейинроқ юзага келиши мумкин бўлган оғир асоратлари" борасида фикр билдиришнинг имкони йўқ.
Алексей Навальный билан боғлиқ ҳодиса
Жорий йил 20 август куни бортида Навальный бўлган самолёт Томскдан Москвага учаётган маҳалда шошилинч тарзда Омскда қўнди. Коррупцияга қарши кураш фонди асосчиси парвоз вақтида ўзини ёмон ҳис қилган, самолёт қўнгач, уни Омскдаги №1 тез тиббий ёрдам касалхонасига жонлантириш бўлимига ётқизишган.
Россиялик шифокорлар бемор пешоби ва қонида заҳарли моддаларни аниқлашмаган. Уларнинг сўзларига кўра, асосий ишчи ташхис - қонда қанд миқдорининг кескин пасайишига сабаб бўлган моддалар алмашинуви бузилишидир. Орадан икки кун ўтгач, шифокорлар беморнинг яқинлари талабига кўра, Навальныйни Германияга даволашга олиб кетишга қарор қиладилар (аввалига консилиум уни транспортабель эмас, дея топган эди). Ўша вақтдан бошлаб КҚФ асосчиси берлиннинг "Шарите" клиникасида даволанаётган эди.
ГФР ҳукумати россияликни "Новичок" жанговар моддаси гуруҳига мансуб субстанция билан заҳарлашгани ҳақида баёнот беришди. Мамлакат вазирлар маҳкамаси маълумотларига кўра, немис экспертлари хулосаларини Швеция ва Франциядаги лабораториялар ҳам тасдиқлашган. Москва таҳлиллар хулосалари бўйича тўлиқроқ маълумотни тақдим этиш илтимосини йўллади, аммо жавоб келмади.
Коррупцияга қарши кураш фонди асосчисининг аҳволи яхшилангани ҳақида 7 сентябр куни хабар берилган эди. Шифокорлар уни кома ҳолатидан чиқаришди ва ИВЛ аппаратидан узишди.
Тез орада Навальныйнинг Instagramдаги расмий аккаунтида, у касалхонага ётқизилгач, шериклари дарҳол адвокат чақиртиришгани ва Томскдаги Xander Hotel (КҚФнинг бутун жамоаси шу меҳмонхонада тўхтаган бўлган) номерида бўлган нарсаларни рўйхатдан ўтказишгани ҳақида маълумот тақдим этилди.
Аниқланган нарсалар хатланган ва кейинги ўрганиш учун терговга тақдим этилган.
Постда айтилишича, натижада сув идишларида немис мутахассислари томонидан "Новичок" излари топилган.
Шу билан бирга, BND - германия разведкасининг 1990-йиллардан бошлаб ушбу моддадан фойдалана олгани маълум. Ушбу модда, шунингдек, 20та ғарб давлатлари, хусусан, Буюк Британия, АҚШ, Швеция, Чехия томонидан ўрганилган. Россия, 1992 йилдаги президент фармонига биноан кимёвий қурол соҳасида ишланмаларни тўхтатган, 2017-йилда эса бу сингари моддаларнинг барча захирасини йўқ қилган, бу ҳолат ОЗХО томонидан тасдиқланган.
