ТОШКЕНТ, 8 дек — Sputnik. Россия ҳукумати раҳбари Дмитрий Медведев Украина суд қарорлари бўйича тўловларни талаб қилишни тўхтатмагунича, Москва ва Киев газ борасида келиша олмаслигини маълум қилди. У бу хақда “Вести в субботу” кўрсатувига берган интервьюсида тўхталиб ўтди. РИА Новости хабарига асосан.
“Бунда ҳеч нарса рўй бермаслиги аниқ. Биласизми, “сиз яна ҳар хил суд қарорлари бўйича ҳам пул тўлашингиз керак” деб турган тараф билан газ бўйича музокараларни ўтказиб бўлмайди. Шунинг учун, улар буни хоҳлашадими ёки йўқ, аниқки, бу ҳолатда қандайдир бир тўхтамга ёки нол вариантга келишиш керак”, - деди Медведев ва қарор ўзаро фойдали бўлиши кераклигини таъкидлади.
Унинг сўзларига кўра, Россия Украина ўзида татбиқ этаётган Европа қонунчилиги асосида ишлашига тайёр.
"Уларга айтилди: марҳамат, бу бизга жуда мос келади, фақат уни ўзингизда татбиқ қилишни тезлаштиринглар, чунки унинг талаблари анча қаттиқ ", - дея қўшимча қилди Медведев.
Шунингдек, у Москва ва Киев газ битимининг барча бандларини келишиб олишлари кераклиги ва шундагина ҳамкорликни тиклашни, шу жумладан, Россия газини Украинага етказиб беришни тиклаш мумкинлигини таъкидлади.
Бош вазирнинг эслатишича, ҳозирда Киев газни Европадан реверс орқали оляпти, Россиядан олиши мумкин бўлган нархдан анча қимматроқ нархда.
"Биз бу ҳақда украиналик ҳамкасбларга турли форматларда айтганмиз. Бу нарх пастроқ бўлиши мумкин ", деди у.
Унинг сўзларига кўра, бунинг учун фақатгина келишиб олиш кифоя.
"Қандай қилиб келишиб олиш мумкин? Ильф ва Петров асаридаги машҳур монтёр айтганидай, келишув – бу томонларнинг қаршилиги йўқлигининг маҳсули. Бирон нарсага мажбурлаш мумкин эмас. Келгуси йилдан транзит тарифингиз 5 баробарга ошди дейиш мумкин эмас", - дея тушунтиради Медведев.
Шунингдек, у Украина ҳудуди орқали газ транзитидан воз кечиш мумкин эмаслигининг сабабларини ҳам келтириб ўтди
"Шундай бўлса-да, биз европалик истеъмолчилар ҳақида, ва хусусан, украиналик ҳамкасбларимиз ҳақида ҳам ўйлашимиз керак, муаммо Киевда ҳокимият тепасида айнан ким ўтирганида эмас, аксинча халқаро мажбуриятларни қўлланилишида”,- таъкидлаганча деди хукумат рахбари.
"Биз ушбу мажбуриятларни давлатнинг бўлажак давлат раҳбарлари томонидан амал қилиниши кераклигидан келиб чиқамиз", - дея хулоса қилди у.
Газ контракти бўйича вазият
Россия газини транзити бўйича амалдаги шартнома шу йил охирида тугайди.
Москва фақатгина халқаро арбитражда даъволарни ўзаро рад этиш ва суд муҳокамасини тўхтатиш шартлари бажарилгандагина янги шартнома имзоланиши мумкинлигини таъкидламоқда.
Киевда бу шартларни номақбул деб ҳисоблашади. “Нафтогаз” “Газпром”га қарши даъволарини 22 миллиард долларга баҳоламоқда.
Янги битимнинг тузилиши Европа комиссияси иштирокидаги маслаҳатлашувларда муҳокама қилинмоқда. Янги уч томонлама учрашувнинг санаси ҳозирча номаълум, ҳозирда Москва ва Киев икки томонлама музокаралар олиб бормоқда.
Куни кеча Россия президенти Владимир Путин Россия ва Украина ҳар икки томон учун мақбул ечим топа олишига умид билдирган эди.
