ТОШКЕНТ, 15 авг – Sputnik. Молия вазирлигининг “Пенсия, нафақа ва бошқа тўловлардан чегирма қилиш тартиби тўғрисидаги йўриқномага ўзгартиришлар киритиш ҳақида”ги буйруқ лойиҳаси тайёрланди.
Ҳужжатга пенсия ишларини расмийлаштириш ва юритиш тартиби ҳамда пенсия ҳужжатларининг шакллари ва уларни тўлдириш қоидалари тўғрисидаги йўриқномага ўзгартиришлар киритиш илова қилинган.
Хусусан, низомнинг 5-банди олтинчи хатбошисидаги “ишга жойлашганлигини яшириш” деган сўзлар “қасддан нотўғри ҳужжатларни тақдим этиш” деган сўзлар билан алмаштириш таклиф этилган.
12-бандда учинчи хатбошидан “, пенсия ва нафақалар тўланган вақтда ишга жойлашганлигини яшириш” деган сўзлар чиқариб ташлаш ёзилган. Низомда комиссия қарори асосида 30 фоизлик чегирма миқдорлари белгиланган.
Шунингдек, тўртинчи хатбошидаги “энг кам иш ҳақининг” деган сўзлар “пенсияни ҳисоблашнинг базавий миқдорининг” деган сўзлар билан алмаштириш таклиф этилган.
Низом талабларига кўра, чегирма миқдори суд қарори билан белгиланган ҳолатларда, чегирма суд қарорида белгиланган тартибда амалга оширилади.
Эслатиб ўтамиз, пенсия, нафақа ва бошқа тўловлардан чегирмалар: суднинг ҳал қилув қарорлари, ажримлари, қарорлари ва ҳукмлари (мулкий ундиришлар борасида), нотариал идораларнинг ижро варақалари ҳамда Ўзбекистон Республикасининг қонун ҳужжатларига мувофиқ ижроси суд ҳал қилув қарорларини ижро этиш учун белгиланган тартибда амалга ошириладиган бошқа ҳал қилув қарорлари ва қарорлар асосида;
Пенсия жамғармаси бўлимининг қарорига биноан — пенсионер ёки нафақа олувчига унинг томонидан қилинган суиистеъмолликлар оқибатида (қасддан нотўғри ҳужжатларни тақдим этиш, боқувчисини йўқотганлик пенсияси тайинланган оила аъзолари таркибидаги ўзгаришлар ҳақида маълумотлар тақдим этмаслик натижасида) ёхуд ҳисоблашдаги ёки бошқа техник хато оқибатида пенсия, нафақа ва бошқа тўловлар миқдоридан ортиқча пуллар тўланган тақдирда қилиниши мумкин.
