ТОШКЕНТ, 8 фев — Sputnik. Оилавий тадбиркорлик билан шуғулланиб келаётган марғилонлик Зарифа Дадажонова Спутник таҳририятига йўллаган мактубида ноҳақликка дуч келаётгани, корхонаси ёпилиш арафасига келиб қолгани, ёрдам сўраб қилган мурожаатларидан эса ҳеч қандай наф бўлмаганини баён этган.
Маълум бўлишича, аёл бўлка нон ишлаб-чиқариш корхонасини очган. Корхонани юрғизиб туриш учун ҳокимликдан ҳар ой 2-3 тонна ун олиб келинган. Аммо ўтган йилнинг май ойидан сўнг ун етказиб бериш ҳеч бир огоҳлантиришсиз ва сабабсиз тўхтатилган.
Тадбиркор аёлнинг ёзишича, 2017 йил июль ойида президент Халқ қабулхонасига ариза билан мурожаат қилгач, уни ҳокимиятга чақириб, келаси ойдан аниқ ун берилишини ваъда қилишган ва аризани ёпиш учун тушунтириш хати ёздириб олишган.
"Халқ қабулхонасидан аризага олган жавобимизда бизга узлуксиз 3 тоннадан ун берилаётгани, келаси ойдан ун миқдори кўпайтириб берилиши, ҳозирда шаҳарга ажратилаётган ун фонди 260 тонна холослиги, тадбиркорлар 40 нафардан кўплиги айтилган. Ваҳоланки бизга ун берилиши бир неча ой олдин тўхтатилган…", — дейди мактуби давомида тадбиркор.
Аёл ўз мактуби давомида Халқ қабулхонасига ёзган аризаси ҳам натижасиз қолганини, шу билан 8 ой давомида ҳар ойда ҳокимиятдан "кейинги ойда берамиз" деган ваъда билан қайтиб келаётганини қўшимча қилган.
Чет элга кетамиз
"2017 йил охирида яна ҳоким ўринбосарига бориб, агар бизга ун бермаса корхонамизни ёпишга мажбур бўлишимизни айтганман.
2016 йил декабр ойида банкдан айланма маблағ учун 26% фоиздан бир йил муддатга 20 000 000 сўм кредит олиб, ун фонди етмаганлиги сабабли, бозордан баланд нархда ун сотиб олиб, иш юритишга мажбур бўлганмиз. Окибатда ишлаб чиқариш ўзини қопламай, касодга учраганмиз", — деб аниқлик киритади Дадажонова.
Спутник Ўзбекистон мухбири тадбиркор аёл йўллаган мактубни чоп этишдан аввал Фарғона вилояти Марғилон шаҳар ҳокимлиги билан боғланди. Марғилон шаҳар ҳокимининг иқтисодиёт ва тадбиркорлик масалалари бўйича биринчи ўринбосари Иқболжон Ғофуров Спутник мухбирининг саволларига жавоб берар экан, "Фирдавс шодлик" оилавий корхонасига ҳокимлик томонидан имкон қадар 3-4 тоннадан ун ажратиб келингани, аммо кейинги вақтларда фондга ажратилган ун миқдори ҳар ойда 30-40 тонна кам бўлаётгани учун айрим тадбиркорлар фаолияти режадан чиқарилганини маълум қилди.
"Тўғри, 6-7та корхонага кейинги вақтларда 1 тоннадан ун ажратиб келаяпмиз. Чунки фондга 285 тонна ун келади, шаҳаримизда 52та тадбиркор рўйхатга олинган. Тўрт-бешта корхонага кўпроқ миқдорда ун ажратишимизни сабаби улар ижтимоий муассасалар билан шартнома тузишган", — деди Ғофуров.
Маълум бўлишича, шаҳарда 29та боғча, 5 та больница ва ҳарбий қисмлар бор.
Дадажонова Спутник мухбири билан суҳбатда, айрим нопок тадбиркорлар "нон ёпиш" учун олинган унни маҳаллий бозорларга олиб чиқиб қопини 85 минг сўмдан пуллашаётганини айтди.
"Таннархи 52 минг сўм (Ғофуров берган маълумот) бўлган ун, бозорларда 33 минг сўм қиммат нархда сотилаётганига, нопок тадбиркорларнинг бу ҳаракатига нима дейсиз?", — деган саволга ҳоким ўринбосари ҳокимлик тадбиркорлар фаолиятига аралашмаслигини, қолаверса бундай ҳолатларни улар ўз кўзлари билан кўрмаганини ва қўли билан ушламаганини маълум қилди.
Корхонасини ёпиш арафасида турган тадбиркор аёл Дадажонова энди ўз фаолияти йўналишини ўзгартирармикин? Нопок тадбиркорларни "ушлаб бериш" билан шуғулланишни хоҳлармикин ё қора ишчиликни афзал кўрармикин?.. Бу масалани ҳокимлик кўриб чиқиб, тегишли чораларни кўради, деган умиддамиз.
Спутник таҳририяти ушбу вазиятни кузатишда давом этади.
