ТОШКЕНТ, 13 дек — Sputnik. Қирғизистон президенти ўзининг чет элга биринчи ташрифини Ўзбекистондан бошлагани биз учун жуда қадрли, халқимиз номидан Сооронбай Жээнбековни президент бўлиб сайлангани билан табриклайман, деди чоршанба куни журналистлар билан учрашувда Ўзбекистон президенти Шавкат Мирзиёев.
Музокаралардан сўнг икки давлат президентлари ОАВ вакиллари билан учрашув ўтказдилар.
Мирзиёев ўз нутқи давомида 2017 йил — тарихий йил бўлганини алоҳида таъкидлаб ўтди.
"Бу йил ҳеч муболағасиз — тарихий йил. Дипломатик муносабатларда бунақаси камдан-кам бўлади. Қирғизистон президенти билан олий даражадаги учрашувларда учинчи бор кўришиб турибмиз. Бу бизнинг халқларимиз хоҳишидан келиб чиқди. Нега мен бу йилни тарихий деб атаябман? Чунки, акам, ҳурматли Алмазбек Шаршенович билан биргаликда бир йил ичида узоқ йиллар давомида тўпланиб қолган масалаларга ечим топдик. Ва бу ҳал этилган масалалар халқларимиз томонидан тўлиқ қўллаб-қувватланмоқда. Халқнинг қўллаб-қувватлаши — бу буюк ишдир", — деди Мирзиёев.
Мирзиёев ўз нутқи давомида Ўзбекистон Қирғизистон билан барча жабҳаларда, хусусан, халқаро ташкилотлар доирасида ҳам яқин ҳамкорликни давом эттиришини қўшимча қилди.
Қирғизистон президенти Сооронбой Жээнбеков ҳам ўз навбатида эришилган келишувлар халқларимиз кутган воқеа бўлганини, ўзаро муносабатлар тарихида қоладиган шундай хайрли ишларга ҳисса қўшганидан мамнун эканини таъкидлади.
