ТОШКЕНТ, 23 сен — Sputnik. Human Rights Watch Халқаро инсон ҳуқуқларини ҳимоя қилиш ташкилоти ҳозирча Ўзбекистонда ўз фаолиятини тиклай олмайди, деб хабар қилди инсон ҳуқуқлари бўйича Ўзбекистон миллий маркази директори Акмал Саидов.
"Ваколатхонанинг очилиши масаласига келсак, Ўзбекистон Олий судининг 2011 йилда чиқарилган қарори бор, уни ҳеч ким бекор қилмаган. Табиийки, бу энг олий инстанция, биз бу масалани Адлия вазирлигида ҳуқуқий томонлама ҳал этишимиз керак", — деб таъкидлаган марказ раҳбари.
Саидовнинг сўзларига кўра, бу ҳуқуқни ҳимоя қилувчи ташкилот аъзолари мамлакатга эркин ташриф буюра олмайди, дегани эмас.
Эслатиб ўтамиз, илгарироқ Ташқи ишлар вазири Абдулазиз Камилов Ўзбекистон HRW делегациясини қабул қилишга тайёрлигини айтган ва шундан сўнг ташкилот мамлакат пойтахтига ташриф буюрган эди.
Ташриф доирасида Ўзбекистонда инсон ҳуқуқларини таъминлаш масалалари ва бу жараёнда ҳуқуқни ҳимоя қилиш ташкилотлари роли борасида муҳокамалар бўлиб ўтган.
Human Rights Watchнинг Тошкентдаги офиси 1996 йилда очилган. Халқаро ташкилот республикада инсон ҳуқуқлари билан боғлиқ ҳолатларни кузатган ва таҳлил қилган. 2010 йилнинг декабрида Адлия вазирлиги HRWнинг мамлакатдаги ваколатхонасини йўқ қилишни сўраб, Ўзбекистон Олий судига арзнома йўллаган. 2011 йилнинг июн ойида ушбу арзнома қаноатлантирилган.
