ТОШКЕНТ, 18 июл — Sputnik. 2017-йилнинг 6-8-сентябр кунлари Тошкент шаҳридаги "Ўзекспомарказ" миллий кўргазмалар мажмуасида II Халқаро мева-сабзавот ярмаркаси бўлиб ўтади, деб хабар қилди Ўзбекистон Ташқи ишлар вазирлиги матбуот-хизмати.
Чет эллик иштирокчиларга эса, ўз давлатлари бозорлари учун мева-сабзавот маҳсулотларини етказиб бериш борасида ҳамкорлик алоқалари ўрнатишга замин яратади.
"II Халқаро мева-сабзавот ярмаркасидан кўзланган асосий мақсад — Ўзбекистонда экологик тоза, хусусиятлари истеъмолбоп ва мазаси бўйича тенги йўқ сабзавот, мева, узум ва полиз маҳсулотлари етиштиришнинг ғоят катта имкониятлари, шунингдек, уларнинг саноат асосида қайта ишланган тайёр сифатли маҳсулотлари тўғрисида хориждаги қайта ишловчи ва савдо компанияларни кенг хабардор қилишдан иборатдир", — дейилади хабарда.
Ярмарканинг асосий вазифалари:
— хорижий ҳамкорларни Ўзбекистон Республикасининг мева-сабзавот маҳсулотлари етиштирувчилари билан таништириш;
— мева-сабзавот маҳсулотлари етказиб бериш бўйича битим ва шартномалар тузиш.
Ярмаркада Ўзбекистоннинг барча ҳудудларидан келган мева-сабзавот маҳсулотларини етказиб берувчилар ва қайта ишловчилар, турдош соҳа вазирлик, идора ва ташкилотларнинг вакиллари ўз маҳсулотларини тақдим этади, бундан ташқари экспортёрлар ва чет эллик харидорларга зарур бўлган маълумотлар беришади.
Кўргазма павильонларида, хусусан Ўзбекистонда етиштирилган хўл, қуритилган ва қайта ишланган мева, сабзавот, полиз ва дуккакли маҳсулотлар ҳамда зираворлар тақдим этилади.
Бугунги кунда маҳаллий мева-сабзавот ишлаб чиқарувчилар учун хорижий қайта ишловчи ва ритейл компаниялари катта қизиқиш уйғотмоқда.
Маҳаллий ишлаб чиқарувчилар ва хорижий иштирокчилар ўртасида кооперация алоқаларини ўрнатиш мақсадида "Ўзекспотцентр" МВК павилонларида "музокара майдончалари" ишлайди, бунда товар етказиб берувчилар хорижий савдо компаниялари, хусусан харид қилиш бўйича қарор қабул қилувчи мутахассислар билан тўғридан-тўғри музокаралар олиб бориш мумкин.
