ТОШКЕНТ, 17 апр — Sputnik. Ўзбекистон Россия Федерацияси ҳудудида бир неча консулхоналар очишни режалаштирган. Бу ҳақда Ўзбекистон ТИВ раҳбари Абдулазиз Комилов Халқаро пресс-клубда журналистларнинг саволларига жавоб қайтариш чоғида айтиб ўтган, деб хабар қилди "Кун.уз" нашри.
Ўзбекистон ТИВ раҳбари хориждаги фуқароларга консуллик хизматлари кўрсатиш борасида муаммолар мавжудлигини қайд этиб ўтган. Унинг маълум қилишича, ҳозирда янги консулхоналар очиш ва янги мутахассисларни бу муаммоларни бартараф этишга жалб этиш ишлари олиб борилмоқда.
Комилов бу масала бўйича Россияда алоҳида муаммолар борлигини қайд этиб, у ердаги ўзбекистонликлар консулхоналаргача минглаб километрларни босиб ўтишига тўғри келаётганини айтиб ўтган.
У ташқи ишлар вазирлигининг асосий мақсади чет элдаги фуқароларнинг манфаатларини ҳимоя қилиш эканини ҳам қўшимча қилиб ўтган.
"Аммо чет элда ўзбекистонликлар кўпайиб боряпти. Одамларимиз элчихона ва консулхоналаримиз фаолиятидан рози дея олмаймиз. Биз бу борада ишлаяпмиз. Консуллик ва уларнинг ходимлари сонини кўпайтирамиз. Уларнинг мулоқот маданиятини ошириб борамиз", деган вазир.
