Ситора Фармонова "КВН"да ўзбек миллати устидан кулган

ТОШКЕНТ, 21 июл — Sputnik. Хонанда Ситора Фармонованинг лицензиядан маҳрум этилгани ижтимоий тармоқларда энг кенг муҳокама қилинаётган мавзулардан бирига айланди, дейиш мумкин.

19 июль куни "Ўзбекнаво" эстрада бирлашмаси Ситора Фармонова, Сарвар Азимов ва Комил Фозиловлар "лицензия битимидаги талаб ва шартларни мунтазам бузиб келгани учун" уларни лицензияларидан маҳрум қилгани ҳақида маълум қилган эди.

"Ўзбекнаво" томонидан эълон қилинган расмий билдиришда “Ўзбекистон Республикаси қонунлари ва Вазирлар Маҳкамаси қарорлари талабини бажариш ҳар бир хонанда ва санъаткорнинг бурчидир”, дейилган эди.

Хонанда битимдаги айнан қайси талабларни бузганлиги ҳақида эса "Ўзбекнаво" матбуот-хизмати айтиб ўтмаган.

Ижтимоий тармоқларда эстрада юлдузига мухлислик қилганларнинг ёзишига кўра, Ситора "КВН"да ўзбек миллати устидан кулганлиги боис лицензиядан маҳрум қилинган.

Darakchi нашрида берилган маълумотларга кўра, Россия телеканалларининг бирида эфирга узатилган “КВН” кўрсатувида актриса ва хонанда Ситора Фармонова Қирғизистон Республикасининг жамоаси номидан иштирок этган. Унинг чиқишида жамоа уни “ўзбекистонлик актриса Европага ўзига эр қидириб келган. Уни бунга ўзбек эри мажбур қилди” қабилида ҳазил қилган.

Спутник Ўзбекистон хонанда билан боғланишга уриниб кўрди, аммо Ситора Фармонованинг телефони ўчирилган эди.

Хонанданинг продюсерига қўнғироқ қилганимизда, у бизга Ситора ҳозирда Тошкентга "Ўзбекнаво" эстрада бирлашмасига бориб, лицензия билан боғлиқ шов-шувларга шахсан ойдинлик киритиш ниятида эканлигини маълум қилди.

Сал олдин Спутник Қирғизистон Ситора Фармонова билан боғланишга муваффақ бўлгани ҳақида ёзган эди. Нашрда берилган хабарга кўра, Ситора Фармонова Спутник Қирғизистон мухбирига "Тафсилотлардан хабарим йўқ. Барча ташкилий ишлар билан продюсерим шуғулланади. Лицензиямдан маҳрум этилганимни эшитиб, ўзим ҳам "шок"ка тушдим. Ҳозирча бу борада ҳеч қандай изоҳ беролмайман", деб айтган.