Обид Асомов ва Муниса Ризаева "Аҳмадбой машмашаси"га изоҳ беришди

ТОШКЕНТ, 5 июл — Sputnik. Ўз вақтида чек қўйилган Аҳмадбой пирамидаси бугун Ўзбекистонда кенг муҳокама қилинаётган мавзуларнинг бирига айланди. Бугун эрталаб эълон қилинган "Аҳмадбойдан жабр кўрган эстрада юлдузлари" рўйхати эса, оловга бензин қуйгандек таъсир кўрсатди, деб айтиш мумкин.

Аҳмадбой томонидан ташланган тўрга илинган санъат юлдузлари қаторида ҳофиз Шерали Жўраев(300 минг $), Рашид Ҳолиқов(250 минг $), Мурод Ражабов(100 минг $), Жаҳонгир Позилжонов(50 минг $), Муниса Ризаева(35 минг $), Сардор Раҳимхон(15 минг $)лар санаб ўтилган эди. Рўйҳатда жами 18 нафар машҳурлар қайд этилган.

Шуни эътироф этиш жоизки, ўзбек эстрадаси юлдузлари ҳозирча Аҳмадбой билан боғлиқ можаро юзасидан изоҳ беришга шошилмаяптилар. Улар бу борада сукут сақлашни маъқул кўришмоқда. Манбаларнинг сўзларига қараганда, санъаткорларнинг аксарияти ҳуқуқни муҳофаза қилиш органи ходимлари ва мухлислар эътиборини жалб қилмаслик мақсадида шундай йўл тутмоқда.

Ўзбек қизиқчиси Обид Асомов ўзининг Instagram саҳифасида Аҳмадбой машмашаси ҳақида қуйидаги жавобини ёзиб қолдирган:

"Бугун бутун мамлакатимизда саломдан кейин бир савол "кўрдингми Аҳмадбой машмашасини!" Аслида бу курсатувга муносабат билдирмасдим, лекин телефоним тутаб кетди! Бутун дунёдан қўнғироқлар! Мен ҳам кўрдим шу кўрсатувни фақат баъзи жойларига тушунмадим! Фирибгар ушланибди жинояти фош бўлибди, жазо олиши муқаррар лекин… Биз санъаткорлар нима қилиб юрибмиз? Тушунмаган томошабин бизни ҳам ҳамтовоққа чиқариб қўйяпти! Айбимиз тўйда хизмат қилганимизми? Аввало тўй ўтган йили янглишмасам ноябрь ойида бўлган эди! Менга шунақа бир бой йигит ўзини фарзандига қўшиб етим болаларни ҳам суннат қилиб беряпти дейишди! Жуда катта тўйхона камида икки минг киши бўлдиёв! Саньаткорлар жуда кўп! Аҳмадбойни ўша куни танидим! Тўйхонада ҳар соҳа вакиллари казо-казолардан тортиб, телевидение ходимларигача бор эди! Биз санъаткормиз бизнесменми, олимми, ҳаммолми айтилган жойга борамиз, тирикчилик! Шахсан мен ҳеч нарсани унга топширганим йўқ! Ўша тўйда унутилмас воқеа бўлган, тўй оҳирида ўша куни кийган янги туфлимни кимдир илиб кетди! Аҳмадбой уйдан ўзини туфлисини обчиқиб берди! Туфли уйда! Мабодо керак бўлса! Мен йўқотган туфлигимга розиман!"

Ўз навбатида, Муниса Ризаева ҳам Instagram саҳифасида Аҳмадбойга ҳеч қандай алоқаси йўқлиги ҳақида ёзган.

"Мен унга ҳеч қандай пул бермаганман, устига-устак фоиз эвазига! Бу ахир катта гуноҳ-ку. Яратган Эгам мендан ўз неъматларини аямаган, ҳамма нарсам етарли. Илтимос, миш-мишларга ишонманг", — дея мурожаат қилган хонанда ўз мухлисларига.