ТОШКЕНТ, 21 апр — Sputnik. Айрим қарздорликлар энди соддалаштирилган тартибда қарздорнинг иш ҳақи, пенсия ва стипендилари ёки банк ҳисобварақларидан ундирилиши мумкин. Бу “Суд ҳужжатлари ва бошқа органлар ҳужжатларини ижро этиш тўғрисида”ги Қонунга киритилган ўзгартириш ва қўшимчаларда белгиланди.
Унга кўра, ижро ишини юритишнинг соддалаштирилган тартиби:
почта ва видеоконференцалоқа харажатлари;
коммунал хизматлар тўлови бўйича қарздорлик;
кўп квартирали уйлар мулкдорларининг мажбурий бадаллари ёки тўловлари бўйича қарздорлик;
БҲМнинг 5 бараваридан (2 060 000 сумдан) кўп бўлмаган суммаларни ундиришга ҳам татбиқ этилади.
Қонунда давлат ижрочиси бундай тартибда, жумладан, ундирувни қарздор жисмоний шахснинг банклардаги ҳисобварақларида турган пул маблағларига қаратиши мумкинлиги белгиланган.
Шунингдек, меҳнатга ҳақ тўлашнинг энг кам миқдори (1 271 000 сўм)дан кўп бўлмаган суммалар бўйича ундирувни қарздорнинг иш ҳақи, стипендияси, пенсияси ва бошқа даромадларига қаратиш мумкин.
Айни пайтда, қўшимчаларга мувофиқ, мазкур мажбурий ижро чоралари видеоконференцалоқа харажатлари, коммунал хизматлар бўйича қарздорлик ва кўп квартирали уйлар мулкдорларининг мажбурий бадаллари ёки тўловларига оид айрим ижро ҳужжатларига нисбатан қўлланилмайди.
Қонун расмий эълон қилинган кундан эътиборан кучга киради.