ТОШКЕНТ, 13 апр — Sputnik. Дональд Трамп маъмурияти Эронга қарши янги зарбалар бериш имкониятини муҳокама қилмоқда. Бу ҳақда The Wall Street Journal ўз манбаларига таяниб маълум қилди, деб
хабар берди РИА Новости.
Нашр ёзишича, бу вариант Исломободдаги музокаралар натижасиз якунланганидан кейин Оқ уйда кўриб чиқилган.
Шу билан бирга, Вашингтон Эронга босимни бошқа йўналишда ҳам кучайтирди. АҚШ ҳарбийлари Эрон портларига кирувчи ва чиқувчи барча денгиз транспортига нисбатан блокада бошланишини расман эълон қилди. Расмий маълумотларга кўра, блокада 13 апрель куни Вашингтон вақти билан соат 10:00 да кучга кириши билдирилди.
Баёнотга кўра, чора Эроннинг мазкур ҳудуддаги барча портларига татбиқ этилади. Айни пайтда Ҳўрмуз бўғози орқали Эронга тегишли бўлмаган портлар томон ҳаракатланаётган кемаларнинг ўтишига тўсқинлик қилинмаслиги қайд этилган.
Associated Press таъкидлашича, Вашингтон бу орқали бир томондан Теҳроннинг нефть экспортидан тушаётган тушумларига зарба беришни, иккинчи томондан эса Эроннинг бўғоз орқали босим ўтказиш имкониятларини чеклашни кўзламоқда.
Вашингтоннинг янги қадами нафақат сиёсий, балки иқтисодий оқибатларга ҳам олиб келди. Маълумотларга кўра, блокада ҳақидаги баёнотлардан кейин нефть нархи кескин кўтарилди: Brent маркали нефть 100 доллардан ошди, WTI ҳам сезиларли қимматлашди. Танкерлар ҳаракати секинлашгани ва айрим кемалар Ҳурмуз бўғозига киришдан тийилгани ҳақида ҳам хабарлар бор.
Экспертлар эса бу сценарий осон амалга ошмаслигини айтмоқда. Reuters суҳбатлашган мутахассисларга кўра, бундай блокада очиқ муддатли ва катта ҳарбий ресурс талаб қиладиган операция бўлиб, у Теҳрон томонидан янги жавоб зарбаларига туртки бериши мумкин.
Эрон Ислом инқилоби қўриқчилари корпуси ҳам ҳарбий кемаларнинг бўғоз яқинига келишини ўт очишни тўхтатиш режими бузилиши деб баҳолашини маълум қилган.