ТОШКЕНТ, 8 апр — Sputnik. АҚШ вице-президенти Жей Ди Вэнс Будапештда Европа Украина можаросининг илдизларига ўзи ҳам ҳисса қўшганини айтди ва инқирозга музокаралар орқали ечим излаш зарурлигини таъкидлади. Бу ҳақда у Будапештда Венгрия бош вазири Виктор Орбан билан ўтказилган қўшма матбуот анжуманида маълум қилди.
“Бу можаронинг уруғлари жанговар ҳаракатлар бошланишидан анча олдин экилган”, — деди Вэнс.
Унинг сўзларига кўра, инқироз илдизларидан бири Европа энергетика сиёсати бўлган.
"Европа етакчилари ўзига хос энергетика иқтисодиётига чуқур шўнғишга қарор қилиб, амалда ўзларини Шарқдан келадиган нефть ва табиий газдан узиб қўйишганида. Бу ўшанда ҳам катта хато эди, ҳозир ҳам катта хато экани аниқ", - деди АҚШ вице-президенти.
У Украина бўйича можарони ҳарбий йўл эмас, балки музокаралар орқали ечим излаш зарурлигини айтди. У Виктор Орбанни “тинчликка эришиш учун украинлар ва русларга нима кераклигини тушунишга ёрдам бераётган” сиёсатчи сифатида таърифлади.
Вэнс, шунингдек, Украина махсус хизматлари АҚШ ва Венгрия сайловларига таъсир ўтказишга урингани ҳақида маълумотлар мавжудлигини айтди.
Орбан ҳам ЕИ Украина бўйича стратегиясини танқид қилди. Унинг фикрича, бу ёндашув ўзини оқламади ва натижада Россия янада кучлироқ ҳолатга келиб қолди. Венгрия ҳукумати аввал ҳам Украинага молиявий ёрдам масаласида Брюссель билан кескин тортишиб келган: март ойида Будапешт Киев учун ажратилиши керак бўлган 90 миллиард евроли кредит берилишини тўсиб қўйган эди.
Бу масала Киев учун айниқса муҳим ҳисобланади. Украина 2026 йилда ташқи молиялаштиришга жуда қаттиқ муҳтож бўлиб турибди, Венгриянинг позицияси эса бюджет босимини янада кучайтирган.