ТОШКЕНТ, 13 мар – Sputnik. Ўзбекистонда алимент тўловчиларга ҳам чет элга чиқиб ишлаш имкони берилиши мумкин. Президент Шавкат Мирзиёев раислигида аҳоли мурожаатлари билан ишлаш тизимини такомиллаштириш юзасидан видеоселектор йиғилишида бу масала муҳокама қилинди.
Қайд этилишича, 2025 йилда алимент билан боғлиқ 70 мингта мурожаат келиб тушган. Мажбурий ижро бюроси алимент бўйича ариза тушса, ундириб бераётгани, лекин алимент тўловчининг расмий даромади бўлмагани учун мурожаатларнинг 30 фоизи ҳал қилинмасдан қолаётгани кўрсатиб ўтилди.
Бу борада ҳокимлар алимент тўловчиларнинг қанчасининг касби бор, лекин ишсиз, қанчасини ўқитиш кераклигини таҳлил қилмаётгани, шундан келиб чиқиб, бандлик бўлими ва “маҳалла еттилиги” олдига аниқ масала қўймаётгани танқид қилинди. Ҳудудларда ишларни шу тартибда ташкил қилса, алимент бўйича мурожаатлар икки карра камайиши мумкинлиги қайд этилди.
Ташкилий миграция асосида одамларни ўқитиб, чет элдаги юқори даромадли ишларга юбориш бўйича тизим яратилгани, лекин алимент мажбурияти бўлган одамлар бу имкониятдан фойдалана олмаётгани қайд этилди. Чунки фуқаро четга чиқиши учун 5 йиллик алимент пулини олдиндан тўлаши ёки алимент олувчидан ёзма розилик олиши керак.
Хорижда ишлаш истагида бўлган алимент тўловчилар билан уч томонлама шартнома тузиб, тил ва касбга ўргатиб, хорижга юқори даромадли ишларга юборилиши мумкин.
Президент мутасаддиларга бу масалани чуқур ўрганиб, тегишли таклиф киритишни топширди.