ТОШКЕНТ, 3 мар — Sputnik. Табиий газ учун иситиш мавсумида белгиланган базавий меъёр Ўзбекистоннинг барча ҳудудларида 15 мартга қадар узайтирилди. Бу ҳақда Энергетика вазирлиги матбуот хизмати хабар берди.
Янгиланган об-ҳаво прогнозларига кўра, совуқ ҳаво массасининг мамлакатнинг бошқа ҳудудларига кириб келиши эҳтимоли туфайли иситиш мавсуми учун белгиланган 500 куб метрлик базавий меъёр 2026 йил 15 мартга қадар амал қилади.
15 мартдан кейин эса об-ҳаво шароитидан келиб чиқиб, зарур ҳолларда қўшимча қарорлар қабул қилиниши мумкин.
Эслатиб ўтамиз, Ўзбекистонда аҳоли учун табиий газ истеъмоли босқичма-босқич тариф асосида ҳисобланади. Иситиш мавсумида ойига 500 куб метргача газ 1 куб метр учун 1000 сўмдан базавий нархда ҳисобланади.
Белгиланган меъёрдан ортиқ истеъмол қилинган газ эса 1 куб метр учун 1800 сўм ва ундан юқори тарифларда ҳисобланади.
15 мартдан бошлаб, агар қўшимча қарор қабул қилинмаса, базавий меъёр ойига 100 куб метрни ташкил этади.