ТОШКЕНТ, 25 фев — Sputnik. Солиқ қўмитаси делегациясининг Россия Федерал солиқ хизматига ишчи ташрифи доирасида томонлар блогерлар ва интернет тармоғида фаолият юритувчи бошқа шахслар даромадлари устидан солиқ назоратини амалга ошириш масалаларини муҳокама қилди.
Хусусан, солиқ хизмати брендини оммалаштириш, очиқликни ошириш ва фуқаролар ишончини мустаҳкамлаш мақсадида медиа ҳамжамият билан яқин ҳамкорликни йўлга қўйиш зарурлигига алоҳида эътибор қаратилди.
Шунингдек, Россия томони солиқ органлари фаолиятида хизмат кўрсатишга йўналтирилган ёндашувлар — солиқ тўловчилар учун қулай хизматлар яратиш, улар билан самарали мулоқот ўрнатиш ва маъмурий тартиб-таомилларни соддалаштириш бўйича тажрибасини тақдим этди.
Тажриба алмашиш илғор ечимларни ўрганиш ва уларни келгусида Ўзбекистон солиқ органлари фаолиятига жорий этиш имкониятларини кўриб чиқишга хизмат қилади.