ТОШКЕНТ, 25 фев — Sputnik. АҚШ президенти Дональд Трамп маъмурияти Украина ҳукуматини Қора денгиздаги Россия нефть инфратузилмасига берилган зарбалар АҚШнинг Қозоғистондаги сармояларига таъсир қилгани ҳақида огоҳлантирди. Бу ҳақда Украинанинг АҚШдаги элчиси Олга Стефанишина CNN телеканалига маълум қилди.
"Украинанинг Новороссийскка ҳужумлари Қозоғистон орқали амалга оширилаётган айрим Америка инвестицияларига таъсир қилгани айтилди. АҚШ Давлат департаменти бизга Америка манфаатларига зарар етказиши мумкин бўлган ҳаракатлардан тийилиш кераклигини билдирди", — деди у.
Стефанишинага кўра, АҚШ Қозоғистонда йирик иқтисодий манфаатларга эга бўлиб, улар Украинадаги сармоялардан анча катта. Шу билан бирга, у Киев мустақиллик йиллари давомида бундай даражадаги инвестицияларни жалб қила олмаганини қайд этди.
Маълумотларга кўра, Америкага тегишли "Chevron" компанияси Каспий қувурлари консорциуми (КТК)нинг йирик акциядорларидан бири ҳисобланади. Ушбу қувур орқали Қозоғистон нефть экспортининг қарийб 80 фоизи амалга оширилади.
Ҳужумлар ортидан Қозоғистон нефть ташиш ва қазиб олиш ҳажмини вақтинча қисқартиришга мажбур бўлди. Қозоғистон Ташқи ишлар вазирлиги Киевдан бундай ҳолатларнинг такрорланмаслиги юзасидан чоралар кутаётганини билдирган. Кейинчалик Остона ва Киев КТК инфратузилмаси бўйича келишувга эришгани маълум қилинди.