ТОШКЕНТ, 18 фев — Sputnik. Ўзбекистонлик меҳнат мигрантларининг қарийб 95 фоизи Россияга ташкилий тартибдан ташқари келади, Россия миграция сиёсатининг янги концепцияси эса бундай жойлаштиришнинг аниқ тизимини жорий этишни таклиф қилади. Бу ҳақда Россиянинг Ўзбекистондаги элчиси Алексей Ерхов Жаҳон иқтисодиёти ва дипломатия университети талабаларига қилган маърузаси давомида маълум қилди, деб хабар берди Sputnik Ўзбекистон мухбири.
Ерховнинг айтишича, ҳозирда Ўзбекистондан Россияга келган меҳнат мигрантларининг аксарияти иш қидириш ва рухсат берувчи ҳужжатларни расмийлаштиришни жойига боргач бошлайди.
Янги ёндашувга кўра, Россияга ишлаш учун бормоқчи бўлган фуқароларни Ўзбекистоннинг ўзида танлаш ва уларни аниқ иш жойига расмийлаштирилган ҳолда юбориш тизими яратилиши таклиф этилмоқда.
Элчининг таъкидлашича, бундай механизмни жорий этишда барча тафсилотларни пухта ишлаб чиқиш муҳим. Тизимни тўғри йўлга қўйиш учун қўшимча вақт ва мувофиқлаштирилган саъй-ҳаракатлар талаб этилади.
Ўзбекистон расмий маълумотларига кўра, 2025 йилнинг январь-сентябрь ойларида хорижга ишлаш учун кетган фуқаролар сони 1,86 миллион кишини ташкил этган. Шундан 1,3 миллиони Россия ҳиссасига тўғри келади.