ТОШКЕНТ, 16 фев — Sputnik. Шавкат Мирзиёевга энг устувор ислоҳотлар дастурлари ҳамда “Ўзбекистон – 2030” стратегиясини 2026 йилда амалга ошириш бўйича Давлат дастури лойиҳалари юзасидан ахборот берилди. Бу ҳақда президент матбуот хизмати хабар қилди.
Қайд этилганидек, янги дастурларда “ҳужжат ишлаб чиқиш”дан “натижага эришиш” тамойилига ўтилмоқда. Ижро учун масъул раҳбарлар ва мувофиқлаштирувчи давлат органлари бириктирилмоқда.
“Маҳаллани ривожлантириш ва жамиятни юксалтириш йили” доирасида 337 банддан иборат амалий чора-тадбирлар режаси тасдиқланмоқда. 2026 йилда 59 та муҳим норматив-ҳуқуқий ҳужжат ва 12 та стратегик ислоҳот лойиҳаси ишлаб чиқилади.
Лойиҳалар кенг жамоатчилик муҳокамасидан ўтказилди. 23 январь — 1 февраль кунлари 5 миллиондан ортиқ фойдаланувчи лойиҳа билан танишди, 22 мингдан зиёд таклиф келиб тушди. Саралаш натижасида 1000 га яқин конструктив таклиф дастурга киритилди.
Жумладан, аёллар ва болаларга нисбатан зўравонлик учун жазони кучайтириш, педофилия учун умрбод қамоқ жазосини жорий этиш, ипотека ва электромобиль хариди учун кредит механизмларини такомиллаштириш, қайта тикланувчи энергия улушини 30 фоизга етказиш, коррупцияга қарши курашни кучайтириш каби ташаббуслар қўллаб-қувватланди.
Шунингдек, маҳалла маблағлари бўйича очиқ ҳисобдорликни ошириш, ички йўл ва велойўлаклар қуриш, бизнес-инкубаторлар ташкил этиш, саноат зоналари ҳузурида қайта тайёрлаш марказлари очиш, дарахт кесиш учун жавобгарликни кучайтириш каби таклифлар маъқулланди.
Хориждаги ватандошлар томонидан таълим, соғлиқни сақлаш, экспортни қўллаб-қувватлаш ва рақамли хизматларни ривожлантиришга оид қатор таклифлар билдирилди.
Дастурларни молиялаштириш учун 250,5 триллион сўм ва 50,4 миллиард доллар маблағ ажратиш режалаштирилган.
Ижро Адлия вазирлиги ва Ҳисоб палатаси томонидан мониторинг қилинади. Вазирлар Маҳкамаси ҳар чоракда муҳокама ўтказади, ҳар ярим йилда Олий Мажлисга ҳисобот тақдим этилади, ҳар ой президентга ахборот киритилади.
Давлат раҳбари тақдим этилган лойиҳалар билан танишиб, тегишли фармонни имзолади.