ТОШКЕНТ, 12 фев — Sputnik. Қўшма Штатларнинг қўшимча ҳарбий кучлари АҚШ президенти Дональд Трамп ва ҳарбий вазир Пит Хегсетнинг буйруғи билан Эрон томон ҳаракатланмоқда. Бу ҳақда АҚШ молия вазири Скотт Бессент маълум қилди.
"Президент ва вазир Хегсет ҳарбий кучларни Эрон йўналишига юбормоқда", — деди у Fox News телеканалига берган интервьюсида.
Бессентнинг қўшимча қилишича, Трамп ва Хегсет бир қатор қарорлар қабул қилиши керак бўлади, бироқ гап айнан қандай қарорлар ҳақида кетаётганига аниқлик киритилмаган.
Аввалроқ "Wall Street Journal" нашри исми ошкор этилмаган америкалик амалдорларга таяниб, Пентагон минтақадаги кескин вазият фонида иккинчи авиаташувчи зарба гуруҳини Яқин Шарққа жойлаштиришга тайёргарлик кўраётгани ҳақида хабар берган эди.
Нашр манбаларига кўра, Трамп ҳозирча иккинчи зарба гуруҳини жўнатиш бўйича расмий буйруқ бермаган. Амалдорлардан бири эса авиаташувчини жойлаштириш тўғрисидаги қарор бир неча соат ичида қабул қилиниши мумкинлигини айтган.
6 февраль куни Ўмон пойтахти Масқатда АҚШ ва Эрон делегациялари ўртасида билвосита музокаралар бўлиб ўтди. Трамп улар яхши ўтганини ва давом этишини таъкидлади.
Шу билан бирга, Эрон ташқи ишлар вазири Аббос Арақчи 8 февраль куни ҳатто уруш хавфи юзага келган тақдирда ҳам Эрон уранни бойитиш ҳуқуқини талаб қилишини маълум қилди.