ТОШКЕНТ, 2 фев — Sputnik. 16 январь-1 февраль кунлари Нидерландиянинг Вейк-ан-Зее шаҳрида ўтган нуфузли "Tata Steel Chess Tournament" мусобақасида Ўзбекистон шахматчилари тарихий натижа қайд этди. Бу ҳақда Ўзбекистон шахмат федерацияси матбуот хизмати хабар берди.
“Masters” гуруҳида 9 очко тўплаган Нодирбек Абдусатторов турнир ғолибига айланди ва ушбу мусобақа тарихида чемпионликни қўлга киритган илк ўзбек шахматчиси бўлди.
Яна бир ўзбекистонлик гроссмейстер — Жавоҳир Синдаров 8,5 очко билан мағлубиятсиз иккинчи ўринни эгаллади. Учинчи ўринни нидерландиялик Ёрден ван Фореест қўлга киритди.
Турнир якунларига кўра, Абдусатторов онлайн рейтингда +19,5 пункт қўшиб, 2770 рейтинг билан жаҳоннинг кучли бешлигига кирди. Синдаров эса +19,4 очко билан 2745 рейтингга етиб, жаҳон рейтингида 11-ўринга кўтарилди.
Шахматчилар 3 февраль куни Тошкент вақти билан соат 04:10 да Истанбул–Тошкент йўналишидаги HY-274 рейси билан Ўзбекистонга қайтиб келиши кутилмоқда.