ТОШКЕНТ, 2 фев — Sputnik. Россия хавфсизлик кучлари Қримда Россия Федерал хавфсизлик хизмати (ФХХ) маъмурий биносида теракт уюштиришга бўлган уринишнинг олдини олди. Бу ҳақда РИА Новости ФХХ Жамоатчилик билан алоқалар маркази маълумотларига таяниб хабар берди.
Маълум қилинишича, Украина махсус хизматлари вакили Telegram орқали қримлик билан боғланиб, ўзини ФХХ ходими сифатида таништирган ва уни "текширув топшириғи" баҳонасида гўёки сотқинларни аниқлаш мақсадида Қрим ва Севастопол бўйича ФХХ бошқармаси биносига ёзиб олиш функциясига эга портатив аудиоколонка олиб киришга кўндирган.
Назорат-ўтказиш пунктида текширув чоғида аудиоколонка ичида 1 кг чет элда ишлаб чиқарилган портловчи модда, электродетонатор ва шикастловчи элементлардан иборат қўлбола портловчи қурилма аниқланган.
Қайд этилишича, қурилма ижрочи томонидан фаоллаштирилиши керак бўлган. ФХХ маълумотига кўра, бу режа нафақат хавфсизлик ходимлари, балки алдов йўли билан жалб қилинган ижрочининг ўзи ҳам ҳалок бўлишига олиб келиши мумкин эди.
Террорчилик ҳаракатини режалаштирган шахс сифатида Одессада яшовчи Украина Қуролли кучлари махсус операциялар бўлимининг ходими Иван Кринов (1996 йилда туғилган) кўрсатилган. У илгари ҳам шу каби уринишни — 54 ёшли аёл ёрдамида православ иконага жойлаштирилган портловчи қурилма орқали амалга оширишга ҳаракат қилгани айтилган.
ФХХ маълумотига кўра, гумонланувчи халқаро қидирувга берилган ва Россия қонунчилигига мувофиқ жиноий жавобгарликка тортилиши билдирилган.