ТОШКЕНТ, 25 янв — Sputnik. Евроосиё иқтисодий иттифоқи (ЕОИИ) мамлакатларида интернет орқали харид қилиш тобора оммалашиб бормоқда. Бу ҳақда ЕИК Истеъмолчилар ҳуқуқларини ҳимоя қилиш бўлими бошлиғи Лидия Осауленко маълум қилди.
Маълумотларга кўра, ЕОИИ аҳолисининг 95 фоизи интернет орқали товар сотиб олади, 80 фоизи эса хизматлардан фойдаланади. Бироқ, истеъмолчиларнинг катта қисми ўз ҳуқуқларининг бузилишига дуч келмоқда — Иттифоқ мамлакатларида ҳар иккинчи фуқаро шундай ҳолатга тушган.
2026 йилда Евроосиё иқтисодий комиссияси ЕОИИ давлатлари билан ҳамкорликда фуқароларнинг интернет орқали товар ва хизматлар харид қилишдаги ҳуқуқлари бўйича хабардорлигини оширишга қаратилган ахборот ва ўқув тадбирларини ўтказишни режалаштирмоқда.
"Биз кўпинча онлайн харид қиламиз, лекин, афсуски, кўпинча ҳуқуқларимизнинг бузилишига дуч келамиз - сифатсиз маҳсулот, етказиб бериш билан боғлиқ муаммолар, пулни қайтариб ололмаслик ва баъзан шунчаки алдов. Айнан шунинг учун ЕОИИда харидорларнинг интернетдаги ҳуқуқлари ва уларни ҳимоя қилиш усуллари ҳақидаги билимларини оширишга алоҳида эътибор қаратилмоқда," - деди Лидия Осауленко.
Шу муносабат билан яқин келажакда истеъмолчилар учун хавфсиз онлайн харид қоидалари, фирибгарликдан ҳимояланиш ва сотувчилар билан юзага келадиган низоларни ҳал қилиш бўйича амалий тавсиялар берилиши кутилмоқда.