ТОШКЕНТ, 19 янв — Sputnik. АҚШ президенти Дональд Трамп Қасим-Жомарт Тоқаевни Ғазо бўйича тинчлик кенгашига таклиф қилди. Бу ҳақда Қозоғистон президенти матбуот котиби Руслан Желдибай маълумотларига таяниб Sputnik Қозоғистон хабар берди.
Қайд этилишича, Тоқаев жаҳон етакчилари орасида биринчилардан бўлиб Дональд Трамп ташаббуси билан тузилаётган Тинчлик кенгаши аъзолиги учун расмий таклиф олган. Қозоғистон ушбу тузилманинг таъсисчи давлатларидан бири бўлиши режалаштирилмоқда.
“Бунга жавобан давлат раҳбари АҚШ президенти номига самимий миннатдорчилик билдирилган ва янги бирлашма таркибига киришга розилик билдирилган мактуб йўллади”, — деди Желдибай.
Маълумотларга кўра, АҚШнинг Ғазо бўйича режасида секторни вақтинчалик халқаро бошқариш ҳамда уни қайта тиклаш жараёнини мувофиқлаштирадиган “Тинчлик кенгаши”ни тузиш кўзда тутилган. Аввалроқ Reuters Дональд Трамп ушбу кенгашнинг умрбод раиси бўлишини режалаштираётганини хабар қилган эди.
Шунингдек, аввалроқ Дональд Трамп Қасим-Жомарт Тоқаев ва Шавкат Мирзиёевни 2026 йилда Майамида бўлиб ўтадиган G20 саммитига таклиф қилган.