ТОШКЕНТ, 12 янв — Sputnik. АҚШ Украина минерал ресурсларидан фойдаланиш орқали оладиган даромад 350 миллиард доллардан сезиларли даражада ошади. Бу ҳақда АҚШ президенти Дональд Трамп журналистлар саволларига жавоб берган чоғида маълум қилди.
"Уйқусираган Жо Байден Украинага 350 миллиард доллар берди ва ҳеч нарса олмади. Мен эса сийрак ер элементларини қайтариб олдим. Ўйлашимча, анча катта қийматни қайтариб олдим", — деди Трамп журналистларга.
Унинг фикрича, Байден ҳам айнан шундай йўл тутиши керак эди.
Маълум қилинишича, АҚШ ва Украина 2025 йил 30 апрелда Украина табиий ресурслари бўйича шартнома имзолаган. Ҳужжатга кўра, АҚШ Украинада ишлаб чиқарилган маҳсулотларни сотиб олишда устувор ҳуқуққа эга бўлади. Шунингдек, томонлар ўртасида бошқарув ва улушлар "50/50" нисбатда тақсимланадиган инвестиция жамғармасини ташкил этиш режалаштирилган.
Битим ўн йил давомида Украина ривожига сармоя киритишни ҳам назарда тутади. Киевнинг АҚШдан оладиган ҳарбий ёрдами эса Америка томонининг мазкур жамғармага қўшган ҳиссаси сифатида ҳисобга олинади. 2025 йил июль ойи ўрталарида Украина Вазирлар Маҳкамаси фойдали қазилмаларни қазиб олишга инвесторларни жалб қилиш учун муҳим минераллар ва ер қаъри участкалари рўйхатини тасдиқлади.
Трамп, шунингдек, Украинадаги вазиятни тартибга солиш борасида муайян тараққиёт борлигини таъкидлади.
"Менимча, биз олдинга силжияпмиз", — деди у.
Унинг қўшимча қилишича, АҚШ Украина можароси давомида НАТОга қурол сотиш орқали даромад олмоқда, бироқ асосий мақсад — инсонлар ҳаётини сақлаб қолиш учун можарони тўхтатишдир.