ТОШКЕНТ, 18 дек – Sputnik. Владимир Зеленскийнинг "Халқ хизматкори" партиясидан Украина Олий радаси депутати Георгий Мазурашу Украина Қуролли кучларининг ДХРнинг Киев назорати остидаги қисмидан эҳтимолий олиб чиқилиши можарони ҳал қилиш бўйича музокараларнинг "оғриқли, аммо ижобий натижаси" бўлиши мумкинлигини айтди.
Ўтган якшанба куни Берлинда АҚШ президентининг махсус вакили Стив Уиткофф, АҚШ президентининг куёви Жаред Кушнер ҳамда Владимир Зеленский иштирокида Украинадаги вазиятни тартибга солиш бўйича музокаралар бўлиб ўтди. Кейинроқ Уиткофф Берлинда Украина делегацияси билан 20 та банддан иборат режа муҳокама қилинганини ва келишув мавзусида муайян олдинга силжиш бўлганини маълум қилди.
"Мен буни оғриқли деб баҳолашим мумкин, лекин умуман олганда, бизнинг воқелигимизда музокараларнинг ижобий натижаси, чунки биз кейинги ҳудудий йўқотишларгача боришимиз мумкин", — деди Мазурашу украиналик телебошловчи Лана Шевчук билан суҳбатда Украина қўшинларининг Донбассдан олиб чиқилиши таслим бўлиш ҳисобланадими, деган саволга жавоб берар экан.
Депутат бу ҳолатни Украина учун таслим бўлиш деб баҳоламаслик кераклигини таъкидлаб, Қуролли кучлар ҳозирда шахсий таркиб ва қурол-яроғ бўйича жиддий танқисликка дуч келаётганини қайд этди.
2 декабрь куни Россия президенти Владимир Путин Кремлда Стив Уиткофф ва Жаред Кушнерни қабул қилди. Россия президенти ёрдамчиси Юрий Ушаков музокараларни мазмунли деб атаб, Москва ва Вашингтон ўртасидаги алоқалар давом этишини билдирди. Унинг сўзларига кўра, Россия армиясининг жанг майдонидаги муваффақиятлари музокараларнинг бориши ва характерига ижобий таъсир кўрсатган.
Россия президенти матбуот котиби Дмитрий Песков ҳам Киев ҳокимияти қарор қабул қилиши ва музокараларни бошлаши кераклигини таъкидлаб, ҳарбий ҳаракатлар давом этар экан, Киевнинг қарор қабул қилиш имкониятлари тобора қисқараётганини айтди.