ТОШКЕНТ, 17 дек – Sputnik. Саноат ва агросаноат мажмуаси бўйича Евроосиё иқтисодий комиссияси ҳайъати (ЕИК) Евроосиё иқтисодий иттифоқига (ЕОИИ) аъзо давлатлар ҳамда ЕОИИ ҳузуридаги кузатувчи давлат — Ўзбекистон Республикасида саноат ишлаб чиқариш қувватларини ташкил этишга қаратилган лойиҳалар шарҳини кўриб чиқди.
Қайд этилишича, мазкур ҳужжат саноат соҳасида амалга оширилаётган лойиҳалар, шунингдек, авиация, автомобилсозлик, кемасозлик, қишлоқ хўжалиги, темир йўл, энергетика машинасозлиги, радиоэлектроника ва бошқа устувор тармоқлардаги инвестициялар ҳажми ҳақидаги маълумотларни ўз ичига олган амалий таҳлилий восита ҳисобланади.
ЕОИИда саноат ҳамкорлигининг асосий йўналишларига мувофиқ, комиссия бундай шарҳларни ҳар йили тайёрлайди. Бу эса асбоб-ускуналар, қурилиш ресурслари истеъмоли ҳамда технологияларни қўллаш бўйича узоқ муддатли эҳтиёжларни аниқлаш имконини беради.
"ЕОИИ саноат кооперациясини ривожлантириш учун салмоқли салоҳиятга эга. Шарҳда келтирилган маълумотлар Иттифоққа аъзо давлатлар саноатида йирик инвестиция лойиҳаларини амалга ошириш учун ускуналар, хомашё, бутловчи қисмларни технологик етказиб бериш йўналишларини аниқлаш имконини беради", — деди ЕИК саноат ва агросаноат вазири Гоар Барсегян.