ТОШКЕНТ, 8 дек – Sputnik. Охирги уч йил ичида Ўзбекистонда муомаладаги банк пластик карталари сони икки баравар кўпайди. Бу Марказий банк ҳисоботидан маълум бўлди.
Унга кўра, мамлакатда тўлов терминаллари сони секин камайиб бораётган бўлса, банкоматлар ва инфокиосклар кескин ортмоқда.
Жорий йил 1 октябрь ҳолатига кўра, муомалада 63,64 миллион дона банк картаси мавжуд. Қиёслаш учун 2022 йил октябрида бу кўрсаткич 31,8 млн тани, 2023 йил октябрида — 41,3 млн та ҳамда 2024 йил октябрида — 53,6 млн тани ташкил қилган.
Октябрь ойи бошида Ўзбекистонда ўрнатилган тўлов терминаллари сони 430,2 мингтани ташкил этди. Бу рақам 2024 йилга нисбатан 6 мингта, 2023 йилга нисбатан 900 та кўп. Аммо 2022 йил (432,2 минг) ва 2021 йил (тахминан 435 минг) кўрсаткичлари билан солиштирганда, терминаллар сони камайиш тенденцияси кузатилмоқда. Шунга қарамай, терминаллар орқали амалга оширилган тўловлар ҳажми ошган:
2025 йил (январь–октябрь) — 318,2 трлн сўм;
2024 йил — 237,5 трлн сўм;
2023 йил — 181,5 трлн сўм.
Республикада банкомат ва инфокиосклар сони уч йилда икки баравар ошган. Уларнинг сони 2022 йилда 19,3 мингта, 2025 йил октябрида эса — 38,1 мингтани ташкил қилган.