ТОШКЕНТ, 2 дек — Sputnik. Ўзбекистон Олий Мажлиси Сенати раисининг биринчи ўринбосари Содиқ Сафоев Россия Федерал Мажлиси Федерация Кенгашининг федератив тузилма, минтақавий сиёсат, маҳаллий ўзини ўзи бошқариш ва Шимол ишлари қўмитаси раиси Андрей Шевченко билан учрашди.
Суҳбат давомида Ўзбекистон ва Россия ўртасидаги стратегик шериклик изчил мустаҳкамланиб бораётгани таъкидланди. Минтақалараро алоқаларнинг фаоллашуви икки томонлама муносабатларни амалий мазмун билан бойитаётгани қайд этилди.
Шунингдек, икки давлат ўртасида маданий-гуманитар ҳамкорлик тобора ривожланиб бораётгани, жумладан 2024 йилда Москвада ўтказилган “Ўзбекистон маданияти кунлари”, Иккинчи жаҳон урушидаги Ғалабанинг 80 йиллигига бағишланган тадбирлар ва туризм соҳасидаги ижобий динамика буни тасдиқлаши таъкидланди.
Учрашув якунида Ўзбекистон ва Россия ўртасидаги стратегик шерикликни, шунингдек парламентлараро мулоқотни янада мустаҳкамлашга келишиб олинди.