ТОШКЕНТ, 30 ноя — Sputnik. Мамлакат "осмонини ёпиш" тўғрисидаги қарор баъзида авиазарбалар олдидан биринчи қадам бўлади. Washington Post Дональд Трампнинг Венесуэла осмонини “ёпиқ” деб эълон қилишга оид баёнотига бағишланган мақоласида шунга эътибор қаратган.
Қуйида хорижий ОАВнинг Трампнинг барча авиакомпанияларни Венесуэла ва унинг атрофидаги ҳаво ҳудудини ёпиқ деб ҳисоблашга чақирган баёнотига билдирган муносабатлари келтирилади.
New York Times газетасининг таъкидлашича, хорижий авиация Вашингтоннинг бундай баёнотларига, уларнинг техник жиҳатдан ноқонунийлигига қарамай, қулоқ солмоқда.
"Трамп АҚШ президенти сифатида Венесуэла ҳаво ҳудудига нисбатан ваколатга эга эмас. Бироқ, хорижий ҳукуматлар ва авиакомпаниялар кўпинча АҚШ кўрсатмаларига амал қилишади. Шу ой бошида АҚШ Федерал авиация бошқармаси (ФАА) мамлакат устидан парвозлар хавфи ҳақида огоҳлантирганидан сўнг бир нечта хорижий авиакомпаниялар Венесуэлага парвозларни бекор қилди," - деб ёзади газета.
Time журнали Трампнинг Мадурога нисбатан эълон қилган ниятлари тобора ишонарсиз бўлиб бораётганига эътибор қаратмоқда.
"Трамп ўзининг биринчи муддати давомида Мадурони ҳокимиятдан четлатишга муваффақиятсиз уринди. Иккинчи муддатга қайтганидан сўнг, у режимни ўзгартиришга интилаётганини рад этади, аммо рад этиш тобора ишончсиз бўлиб бормоқда," - дейилади мақолада.
Маълумот учун, Дональд Трамп мазкур баёнотини Truth Social ижтимоий тармоғида эълон қилган эди.
"Барча авиакомпаниялар, учувчилар, гиёҳванд моддалар савдогарлари ва одам савдогарларига: илтимос, Венесуэла ва унинг атрофидаги ҳаво ҳудудини тўлиқ ёпиқ деб ҳисобланг," - деб ёзди у.