ТОШКЕНТ, 23 ноя — Sputnik. Печора ва Шимолий Двина дарёларидан Донбассга қувур орқали сув етказиб бериш лойиҳаси 2 декабрь куни Россия Фанлар академияси (РФА) Ер ҳақидаги фанлар бўлими йиғилишида муҳокама қилинади. Бу ҳақда ТАСС агентлигига РФА Сув муаммолари институти илмий раҳбари Виктор Данилов-Данилян маълум қилди.
Унинг айтишича, масала 22 октябрь куни РФАнинг “Қуруқликдаги сув ресурслари” илмий кенгашида кўриб чиқилган.
"Бу 22 октябрь куни РФА "Қуруқликдаги сув ресурслари" илмий кенгаши йиғилишида кўриб чиқилди. 2 декабрда Ер ҳақидаги фанлар бўлимида тегишли маъруза қиламан. Ўйлайманки, у ерда ҳаммаси силлиқ ўтади, мен ўзим шу бўлимнинг аъзосиман, ҳаммани бу иш билан жиддий шуғулланиш кераклигига ишонтираман. Ер ҳақидаги фанлар бўлими овоз берса, академия президиуми ҳам овоз беради", — деди Данилов-Данилян.
Лойиҳага кўра, ушбу дарёлардан келадиган сув Шимолий Муз океанига қуйилмасдан, Кама ва Волга орқали ўтказилиши, кейин эса Азов бўйидаги Волга–Дон-2 каналига йўналтирилиши керак. Бунда сувни узатиш учун "Газпром" газ генераторларидан фойдаланиш мумкин.
"Бизда эски технологиядан тубдан фарқ қиладиган, амалда фильтрациянинг йўқлигини кафолатлайдиган янги технология мавжуд. Ҳатто ижобий томонлари ҳам бор — Шимол исиб бормоқда, яхши маълумки, Шимолий Муз океанининг экотизимлари қайта шаклланмоқда ва агар дарёлар олиб келадиган илиқ сувнинг бир қисмини олиб қўйсак, уларнинг мослашишини осонлаштирамиз, чунки исиш жараёни секинлашади", — деди агентлик суҳбатдоши.
Бундан ташқари, унинг сўзларига кўра, совет давридан бери Обь дарёсининг қуйи оқимидан Қозоғистон ва Ўзбекистоннинг Орол минтақасига сув ўтказиш лойиҳаси мавжуд, аммо у ҳозирда долзарб эмас.
"Агар бу билан шуғулланилса, биринчи навбатда Россиянинг сув ўтказиш лойиҳаси ишлаб чиқилиши керак. У ерда эса ҳал қилиш осон бўлмаган халқаро муаммолар бор", — деди Данилов-Данилян.