ТОШКЕНТ, 17 ноя – Sputnik. Ўзбекистоннинг Хоразм вилояти ва Туркманистоннинг Тошҳовуз вилояти ўртасидаги савдо-иқтисодий алоқаларни кенгайтиришга хизмат қиладиган “Шовот–Тошҳовуз” қўшма чегараолди савдо зонаси ишга тушди. Бу ҳақда президент матбуот хизмати хабар берди.
Ишга тушириш маросимида президент Шавкат Мирзиёев ва Туркманистон президенти Сердар Бердимуҳамедов иштирок этдилар.
Мазкур ҳудудда дирекция, божхона, карантин, фитосанитария ва ветеринария хизматларининг маъмурий бинолари, савдо павильони ва омборлар жойлашган.
Бу ерда “ягона дарча” тамойили асосида давлат хизматлари кўрсатилади, интерфаол тизимлар, банк, тиббиёт ва меҳмонхона хизматлари учун зарур инфратузилма, шунингдек, катта автотураргоҳ ҳам ташкил этилган.