ТОШКЕНТ, 17 ноя – Sputnik. Кўксарой қароргоҳида президент Шавкат Мирзиёев ва Туркманистон президенти Сердар Бердимуҳамедовнинг тор доирадаги музокаралари бўлиб ўтди. Бу ҳақда президент матбуот хизмати хабар берди.
Хабарда қайд этилишича, сўнгги йилда икки давлат ўртасидаги товар айирбошлаш ҳажми 1 миллиард доллардан ошган. Юк ташиш ҳажми ҳам ўсиб бормоқда, жумладан, Туркманбоши портидан фойдаланиш фаоллашган.
Музокараларда ўзаро савдони янада кўпайтириш, шунингдек саноат, энергетика, транспорт, машинасозлик, қишлоқ ва сув хўжалиги соҳаларида кооперацияни ривожлантириш масалаларига алоҳида эътибор қаратилди.
Ҳудудлараро алмашинувларни янада кенгайтириш муҳимлиги таъкидланди. Хива шаҳрида учинчи Ҳудудлар форумини ўтказишга келишиб олинди.
Минтақавий ва халқаро аҳамиятга молик масалалар юзасидан ҳам фикр алмашилди.