ТОШКЕНТ, 11 ноя — Sputnik. Огоҳлантиришдан кейин беш кун ичида чиқинди хизмати учун қарзни тўламаган Тошкент шаҳридаги 6 минг абонентнинг электр энергиясига тўлов қилиш имконияти вақтинча чекланди. Бу ҳақда Чиқиндиларни бошқариш ва циркуляр иқтисодиёт агентлиги хабар берди.
Маълумотга кўра, 5 ноябрь куни Тошкент шаҳри бўйича чиқинди хизматларидан келиб чиққан 2 миллиард сўмдан ортиқ дебитор қарз учун жами 25 минг 121 абонент “Ҳудудий электр тармоқлари” АЖнинг “2100” рақамидан SMS орқали огоҳлантирилган.
Ҳозирда пойтахтда чиқинди хизматларига оид 582 миллион сўмдан ортиқ қарз мавжуд. Чеклов қарз тўланганидан сўнг дарҳол ечилади.
Шунингдек, декабрь ойидан бу тизим мамлакатнинг барча ҳудудларида жорий этилиши режалаштирилган.
Мазкур тартиб 2025 йил 7 мартда қабул қилинган 1044-сонли қонунга асосан жорий этилган бўлиб, фақат 2025 йил 1 июлидан кейинги қарздорликларга нисбатан қўлланилади.