ТОШКЕНТ, 31 окт – Sputnik. Олимпиада чемпиони ва мағлубиятсиз профессионал боксчи Баҳодир Жалолов ўзининг навбатдаги жангини 14 ноябрь куни Ўзбекистон пойтахтидаги "Humo Arena"да ўтказади.
Жалоловнинг рақиби нигериялик кучли нокаутчи Соломон Адебайо бўлади. Жанг 8 раундга мўлжалланган.
Жалолов 6 октябрь куни Санкт-Петербургда бўлиб ўтган сўнгги жангида россиялик Виталий Кудуховни очколар ҳисобига кўра ишончли тарзда мағлуб этди.
Нигериялик Адебайо эса 2024 йил июлидан бери рингга чиқмаётган эди — ўшанда у биринчи раундда намибиялик Лукас Ндафолумани нокаутга учратган.
Иккала жангчи ҳам кучли зарба ва нокаут билан ғалаба қозонишнинг юқори фоизига эга: Жалолов — 16 жангда 14 нокаут, Адебайо — 14 жангда 13 нокаут.
Иккала боксчи ҳам шу кунгача бирон марта мағлубиятга учрамаган.
Шу куни Баҳодир Жалоловдан ташқари ўзбек боксининг бошқа юлдузлари ҳам рингга кўтарилади: Шаҳрам Ғиёсов, Бахт Илёсов, Лазизбек Мулложонов, Нурислом Исмоилов, Вилохон Абдуллаев, Шоҳжаҳон Абдуллаев, Озодбек Алиев ва Хурсанд Имонқулиев.