ТОШКЕНТ, 17 окт — Sputnik. АҚШ президенти Дональд Трамп Россия президенти Владимир Путин билан учрашув ўтказишини эълон қилди. Музокаралар Венгрия пойтахти Будапештда бўлиб ўтади. Бу ҳақда Трамп ўзининг "Truth Social" саҳифасида маълум қилди.
Учрашувнинг асосий мавзуси — Украина урушига барҳам бериш. Трампнинг айтишича, бу борада Путин билан ўтказилган телефон мулоқоти жуда самарали кечган.
"Мен бугун Россия президенти Владимир Путин билан телефон орқали жуда самарали суҳбат ўтказдим. Биз ушбу “шармандали” урушни тўхтатиш йўлларини муҳокама қилдик. Путин билан Будапештда учрашишга келишдик", — деб ёзди Трамп.
Унинг қўшимча қилишича, Будапештдаги учрашувдан олдин икки давлатнинг юқори мартабали вакилларидан иборат делегациялар музокаралар олиб боради. АҚШ делегациясига давлат котиби Марко Рубио бошчилик қилади. Бу учрашувнинг аниқ жойи ҳозирча белгиланмаган.
Трамп, шунингдек, эртага Оқ уйда Владимир Зеленский билан учрашишини, суҳбат давомида Путин билан бўлган телефон мулоқоти ва бошқа масалаларни муҳокама қилишини маълум қилди.
“Мен бугун эришилган ютуқ Украина бўйича музокараларимизга ҳам ижобий таъсир қилади, деб ҳисоблайман”, — дея таъкидлади АҚШ президенти.
Шунингдек, Трамп телефон суҳбат чоғида Владимир Путин унга Яқин Шарқдаги сулҳ — Исроил ва ҲАМАС ўртасидаги уруш тўхтатилгани муносабати билан табрик йўллаганини айтди. Россия президенти бу воқеани “асрлар орзу қилган тинчлик” деб атаган.
Трампнинг сўзларига кўра, томонлар урушдан кейинги даврда Россия-АҚШ савдо алоқаларини тиклаш бўйича ҳам фикр алмашган.