ТОШКЕНТ, 10 окт – Sputnik. Ўзбекистон олий таълим, фан ва инновациялар вазири Қўнғиротбой Шарипов Беларусь таълим вазирининг биринчи ўринбосари Александр Бахановични қабул қилди.
Суҳбатда икки мамлакат ўртасидаги таълим соҳасидаги ҳамкорлик, хусусан, касбий таълим тизимини ривожлантириш, педагоглар малакасини ошириш ва илғор тажрибаларни татбиқ этиш масалалари муҳокама қилинди.
Томонлар АТ технологиялари, энергетика, қурилиш ва экология каби йўналишларда Беларусь тажрибасини ўрганиш, шунингдек, компетенция марказлари фаолиятини ривожлантириш бўйича ҳамкорликни кенгайтириш зарурлигини таъкидлашди.
Учрашув якунида томонлар таълим ва илмий тадқиқот соҳасидаги алоқаларни янада чуқурлаштириш ҳамда ўзаро тажриба алмашувни давом эттиришга келишиб олишди.