ТОШКЕНТ, 9 окт – Sputnik. Она ва бола саломатлиги илмий-амалий тиббиёт марказининг Чирчиқ шаҳридаги Тошкент вилояти филиалида ноёб операция ўтказилди. Бу ҳақда Соғлиқни сақлаш вазирлиги матбуот хизмати хабар берди.
Кесарча кесиш йўли билан муддатидан аввал дунёга келган сиам эгизаклари туғуруқдан 9 соат ўтиб, шошилинч равишда маҳаллий шароитда ўта мураккаб амалиёт орқали ажратиб олинди.
Беш соат давом этган юқори технологик операция Неонатал хирургия маркази раҳбари профессор Бахтиёр Эргашев бошчилигидаги малакали мутахассислар томонидан бажарилди.
Соғлиқни сақлаш вазири Асилбек Худаяровнинг таъкидлашича, бундай мураккаб амалиётлар ҳатто ривожланган давлатларда ҳам узоқ тайёргарликдан сўнг бажарилади. Вилоят даражасида муддатидан аввал туғилган сиам эгизакларни муваффақиятли ажратиш — мамлакат тиббиёти янги босқичга кўтарилганининг ёрқин далилидир.
Сиам эгизакларини ажратиб олиш операциясида иштирок этган бир гуруҳ мутахассислар “Ўзбекистон Республикаси соғлиқни сақлаш аълочиси” кўкрак нишони билан тақдирланди.
Саломатлиги яхшиланган беморлар ва уларнинг онасига шифохонадан уйига жавоб берилди.
Эслатиб ўтамиз, ўзбекистонлик шифокорлар илк бор сиам эгизакларини 2023 йилда муваффақиятли ажратиб олишган эди. Ўшанда қирғизистонлик сиам эгизакларда ўта ноёб операция ўтказилганди.