ТОШКЕНТ, 25 сен — Sputnik. 25 сентябрь куни Ўзбекистон ташқи ишлар вазири Бахтиёр Саидов Осиёда ҳамкорлик ва ишонч чоралари бўйича кенгаш (ОҲИЧК) ташқи ишлар вазирлари норасмий йиғилишида иштирок этди. Бу ҳақда Ташқи ишлар вазирлиги матбуот хизмати хабар берди.
"Мулоқот жараёни минтақавий ва глобал масалалар, шунингдек, Осиё бўйлаб ишончни мустаҳкамлаш чораларини янада кучайтириш юзасидан ҳамкасблар билан фикр алмашиш учун муҳим имконият бўлди", - деб ёзди Саидов ўзининг Телеграм-каналида.
Ўзбекистон ОҲИЧК мақсад ва тамойилларига содиқ қолади ҳамда умумий маконда мулоқот, ишонч ва ҳамкорликни мустаҳкамлашга қаратилган саъй-ҳаракатларни изчил қўллаб-қувватлашда давом этади.
Маълумот учун: Кенгаш Осиёда тинчлик, хавфсизлик ва барқарорликни таъминлашга қаратилган ҳамкорликни мустаҳкамлаш бўйича халқаро форум ҳисобланади.