ТОШКЕНТ, 9 сен — Sputnik. Ўзбекистонда давлат хизматлари кўрсатишда талаб қилинадиган ҳужжатлар сони қисқартирилади. Президент Шавкат Мирзиёев тегишли фармонни имзолади, дея хабар берди Адлия вазирлиги.
Фармонга кўра, 2025 йил 1 декабрдан бошлаб идоралар ўртасида электрон ахборот алмашинуви йўлга қўйилиши натижасида қуйидаги талаблар бекор қилинади:
никоҳни расмийлаштиришда ФҲДЁ органлари томонидан никоҳланувчилардан тиббий кўрик натижаларини тақдим этиш талаби;
никоҳ суд қарори асосида бекор қилинганда, ажрим ҳақидаги далолатнома ёзувини шакллантириш учун ФҲДЁ органлари суд қарорини сўраши талаби;
автомототранспорт воситаси рўйхатга олинганлик гувоҳномасида унинг эгасининг манзилини кўрсатиш талаби.
Ҳужжатда қуйидаги вазифалар белгиланган:
2028 йилга қадар my.gov.uz портали ва Давлат хизматлари марказлари орқали кўрсатиладиган хизматлар сонини 900 тага етказиш;
проактив давлат хизматлари сонини 53 тага, композит хизматлар сонини 74 тага етказиш.
Маълум бўлишича, мазкур фармондан давлат хизматларини кўрсатишда ортиқча ҳужжатлар ва тартибларни қисқартириш, қулайликларни ошириш мақсади кўзланган.