ТОШКЕНТ, 26 авг — Sputnik. Тошкент шаҳридаги “Алпомиш” спорт саройида гандбол бўйича U19 ёш тоифасида қизлар жамоалари ўртасида ўтаётган Осиё чемпионати гуруҳ босқичи сўнгги, 4-тур доирасида Ўзбекистон терма жамоаси Хитойга қарши майдонга тушди.
Қизғин курашда хитойликлар 29:25 ҳисобида ғалаба қозонишди. Шу тариқа Хитой “А” гуруҳида 1-ўринни, Ўзбекистон эса 2-ўринни эгаллади.
Ўзбекистон қизлар терма жамоаси аввалги уч турда зафар қучиб, ярим финалга йўлланма олган эди. Регламентга кўра, ярим финалга чиққан 4 жамоа жаҳон чемпионатига йўлланма қўлга киритади.
Натижада, ҳам Хитой, ҳам Ўзбекистон қизлар терма жамоаси келаси йили бўлиб ўтадиган жаҳон чемпионатида иштирок этиш ҳуқуқини қўлга киритди.