ТОШКЕНТ, 17 авг – Sputnik. Ўзбекистон президентининг Қорақалпоғистонни ижтимоий ва иқтисодий тарафлама ривожлантиришга қаратилган қарори қабул қилинди. Бу ҳақда Адлия вазирлигининг “Ҳуқуқий ахборот” Telegram-каналида маълум қилинди.
Қуйидагилар 2025–2026 йилларда Қорақалпоғистон Республикасини барқарор ижтимоий-иқтисодий ривожлантиришнинг асосий мақсадли кўрсаткичлари этиб белгиланди, жумладан:
ялпи ҳудудий маҳсулот ҳажмини ўртача 6–6,5 фоизга етказиш;
саноат ишлаб чиқариши ҳажмини 5–6 фоизга етказиш;
бозор хизматлари ҳажмини 15–17 фоизга етказиш.
Қарорга кўра, Қорақалпоғистон Республикасини 2035 йилгача ривожлантириш бўйича стратегия 5 йиллик батафсил дастур асосида амалга оширилади.
Дастурни молиялаштириш учун натижага асосланган молиялаштириш тизими (PforR) бўйича 150–200 млн доллар миқдоридаги хорижий маблағлар жалб қилинади.