ТОШКЕНТ, 21 июл – Sputnik. Фарғона вилояти Данғара туманида мис ва алюмин симлар ишлаб чиқариш лойиҳаси амалга оширилмоқда. Бу ҳақда вилоят матбуот хизмати хабар берди.
Маълум қилинишича, вилоят ҳокими Хайрулло Бозоров тожикистонлик инвестор Шуҳратжон Ашурматов ва унинг фарғоналик ҳамкори Фотима Имомовани қабул қилган.
Мулоқотда Данғара туманида “Осиё кабеллари” МЧЖ томонидан амалга оширилаётган мис ва алюмин симлар ишлаб чиқариш лойиҳаси муҳокама қилинган.
“Лойиҳа тўғридан-тўғри 10 миллион доллар миқдоридаги хорижий инвестиция ҳисобига молиялаштирилаётган бўлиб, уни амалга ошириш натижасида 100 та янги иш ўрни яратилиши режалаштирилган. Учрашув давомида лойиҳа ишларини жадаллаштириш, муҳандислик-коммуникация инфратузилмалари билан боғлиқ масалалар муҳокама қилинди”, – дейилади хабарда.
Вилоят ҳокими лойиҳани қўллаб-қувватлаб, амалий ёрдам кўрсатилишини таъкидлаган.